Futbol yığmamızın keçmiş baş məşqçisi dünyasını dəyişdi
Virtualaz.org xatırladır ki, Karlos Alberto 17 iyul 1944-cü ildə Rio-de-Janeyroda anadan olub. 1970-ci ildə Braziliya milli futbol komandasının heyətində dünya çempionu olub. Həmin çempionatda komandasının kapitanı idi.
XX əsr simvolik futbol yığmasının heyətinə daxil edilib. Bəzi mütəxəssislərin fikrincə, Karlos Alberto 1970-ci il dünya çempionatının final oyununda futbol tarixində ən yaxşı qola imza atıb.
O, Azərbaycan yığmasına dünya çempionatı 2006-nın seçim turniri dövründə başçılıq edib. Həmin seçim yarışlarında komandamız Uels, Şimali İrlandiya və Avstriya ilə heç-heçə oynayaraq 3 xal yığmışdı.
Düzdür, avstriyalılarla oyunda Torres artıq yox idi. O, 2005-ci ilin iyununda ev matçında Polşaya 0:3 hesabı ilə məğlub olduqdan sonra baş məşqçi postunu tərk etmişdi. Yeri gəlmişkən, o həmin oyunun gedişində özünü saxlaya bilməyərək ehtiyat hakimi vurmuş və meydandan uzaqlaşdırılmışdı.