Azərbaycan Beynəlxalq Bankından 10 mlrd. manatlıq aktiv köçürülüb
2012-ci ildən bu günədək hökumət "Azərbaycan Beynəlxalq Bankı" ASC-yə (ABB) 1,151 mlrd. manat kapital ayırıb.
Bu barədə "Fitch" beynəlxalq reytinq agentliyinin ABB ilə bağlı hazırladığı hesabatında qeyd olunub.
Hesabata əsasən, 2012-ci ildə banka 91 mln. manat, 2013-cü ildə 116 mln. manat, 2014-cü ildə 93 mln. manat, 2015-ci ildə 51 mln. manat, ötən il 199 mln. manat, bu il isə 600 mln. manat kapital ayrılıb.
Sənəddə qeyd olunub ki, ümumilikdə ABB-nin 9,923 mlrd. manatlıq aktivi köçürülüb. Bunun 2,314 mlrd. manatı 2015-ci ildə, 7,609 mlrd. manatı isə 2016-cı ildə həyata keçirilib.
Agentliyin analitikləri hesabatda ABB-yə əlavə dəstəyin göstərilməsinin mümkünlüyünü də vurğulayıb. Bildirilir ki, banka əlavə dəstək xarici valyuta qarşılığında əlavə olaraq 5 mlrd. manat aktivin köçürülməsi, ABB-nin dövlət öhdəliklərinin yerli valyutaya konvertasiyası və ya hecinq vasitəsilə qısa valyuta mövqeyinin qapanması üçün tədbirlər, o cümlədən banka əlavə kapital dəstəyi formasında baş tuta bilər. "Buna baxmayaraq, toksik aktivlərin ötürülməsindən sonra belə ABB-nin inkişafla bağlı strategiyası aydın deyil", - deyə hesabatda qeyd olunub. (APA)
