"Lənkəranski dəstəsi"nin üzvləri həbsdən buraxıldı
Rusiyanın Nijni Taqil Şəhər Məhkəməsində Rövşən Lənkəranskiyə yaxınlığı ilə seçilən azərbaycanlı dəstə üzvləri barədə qərar qəbul edilib.
Lent.az-ın məlumatına görə, dəstənin 4 əsas üzvü haqqında seçilmiş həbs-qətimkan tədbiri ev dustaqlığı qətimkan tədbiri ilə əvəzlənib. Məhkəmə Xıdır Q., İlkin A., Orxan M. və Telman V.-ni ev dustaqlığına məhkum edib.
Digər dəstə üzvləri isə sərbəst buraxılıb.
30 nəfərdən ibarət dəstənin üzvləri keçən il avqustun 4-də həbs edilmişdilər. Onlar şəhərin mərkəzindəki restoranların birində “sxodka” zamanı saxlanılmışdılar. Dəstə üzvlərinə qarşı əməliyyatda təkcə polislər yox, yerli OMON da iştirak etmişdi.
Məlumata görə, dəstə üzvləri yerli iş adamlarına haqq qoyaraq onlardan mütəmadi və özü də külli miqdarda pul alırmışlar. Hədə-qorxunu zamanı isə “qanuni oğru” Rövşən Lənkəranskinin adından istifadə edirmişlər.
