ABŞ-da yaşayan istedadlı gənc xanım
Rusiyanın Petropavlovsk-Kamçatsk şəhərində dünyaya gəlib. O vaxt atası hərbçi olduğu üçün ailəsi ilə birlikdə həmin şəhərdə məskunlaşmışdıar. Beş yaşında olarkən Bakıya köçüblər. 2006-cı ildə 2 nömrəli orta məktəbin 11-ci sinfində oxuyarkən xüsusi təhsil proqramı ilə ABŞ-a gəlib. İki il Missuri ştatının Sent Lüis şəhərindəki məktəblərdən birində tam orta təhsil alıb. 2008-2013-cü illərdə Sent Lüis Lindenvud Universitetində təhsilini artıraraq biznesin idarə olunması və siyasi elmlər ixtisasına yiyələnib. Sonra bir müddət Kaliforniya ştatının Los Ancles şəhərində yaşayıb. Orada olarkən altı ay "Candy Ranch" televiziya serialında aktyor kimi rola çəkilib. Bundan əlavə "The Blacklist" tv şousunda iştirak edib. 2010-cu ildə Sent Lüis beynəlxalq musiqi festivalına qatılaraq, bu tədbirdə ilk azərbaycanlı olaraq birinci yeri qazanıb. 2013-cü ildə Florida ştatının Mayami şəhərinə gedib. Orada "Zamira Equities" şirkətini yaradıb. Şirkət köhnə evləri alıb, təmiri və satışı ilə məşğul olur. 2018-ci ilin iyun ayında "CESD" şirkətinin dəvəti ilə Nyu York şəhərinə köçüb…
…Ömür-gün yoldaşı Jo Skattolon italyandır. Braziliyada doğulub boya-başa çatıb. "Economist" siyasi jurnalında marketinq üzrə menecerdir. Yeri gəlmişkən, Jonun həmin jurnalda Azərbaycan haqqında bir neçə yazısı işıq üzü görüb…
Zamira xanım Nyu Yorka gələndən sonra "LG", "Samsung", "Converse" kimi məşhur şirkətlərin məhsullarının reklam çarxlarına çəkilir. Eyni zamanda yaratdığı "Zamira Equities" şirkətinə rəhbərlik edir. Böyük tennis oynamağı xoşlayır. Səhnə bacarıqlarını təkmilləşdirməyə çalışır. İstəyir ki, bir aktyor kimi "Hollywood" filmlərində rol alsın, daha çox televiziya şoularında çıxış etsin. Tezliklə Texas ştatına köçmək, orada məşğul olduğu biznes sahəsini böyütmək isə əsas arzularındandır.
Erkən yaşlarından ABŞ-a təhsil almaq üçün gələn, azərbaycan dilində təmiz danışmağı bacaran, yüksək zövqlü bu gəncin ən böyük uğurları hələ irəlidədir. İnanırıq ki, teleşoularda doğma vətəni təbliğ edən bu mehriban, gülərüz xanım tezliklə ABŞ-ın məşhur insanlarından birinə çevriləcək. "YouTube"də yerləşdirdiyi çıxışlarını milyonlarla tamaşaçının izləməsi bunu deməyə əsas verir…
Bəli, sizinlə amerikalılar arasında artıq tanınmağa başlayan bir azərbaycanlı istedadlı xanım, Zamira Dadaşova- Skattolon haqqında söhbət edirdim…
Elman Eldaroğlu,
ABŞ, Miçiqan
