“Günəşli” faciəsindən 2 il ötür
Bu gün “Günəşli” neft yatağında baş vermiş faciədən 2 il ötür.
Hadisə 2015-ci ilin 4 dekabr tarixində baş verib. "Günəşli" neft yatağının 10 saylı dərin dəniz özülündə baş vermiş hadisə nəticəsində 63 nəfər zərər çəkib.
Hadisəyə ilkin səbəb kimi göstərilirdi ki, nəhəng dalğalar Dövlət Neft Şirkətinin “Günəşli” yatağındakı 10 saylı dərin dəniz özülündə 110 atmosfer təzyiqlə işləyən sualtı qaz xəttinin dayaq borusunu qırıb, nəticədə boru kəməri zədələnib və şiddətli yanğın baş verib.
Təlimata və təxliyyə planına uyğun olaraq, yanğın baş verə biləcək partlayışdan xilas olmaq məqsədi ilə işçilər özüldəki iki xilasedici qayığa minib və qayıqları aşağı buraxılıb. Qayıqlar dəniz səviyyəsindən təqribən 10 metr məsafəyə qədər endirilərək saxlanılıb. Qəza baş verəndən sonra özüldə baş verən yanğını söndürmək üçün yanğınsöndürən və xilasedici gəmilər əraziyə gəlib.
Lakin qasırğanın güclənməsi, dalğanın faktiki hündürlüyünün 9-10 metrə qədər çatması səbəbindən gəmilərin heç biri özülə yan ala bilməyib. Axşam saatlarında isə güclü küləyin təsiri və hündür dalğaların zərbəsi nəticəsində xilasedici qayıqlardan birinin qarmağı açılıb və qayıq, içindəki adamlarla birlikdə dənizə düşüb.
Ümumilikdə yanğın zamanı platformadakı 33 nəfər xilas edilib, 11 nəfər həlak olub. 19 neftçi itkin düşmüş kimi qeydə alınıb. Hadisə ilə əlaqədar Prezident İlham Əliyevin qərarı ilə Azərbaycanda 2015-ci ilin 6 dekabr tarixində matəm günü elan olunub.
Hadisədən bir neçə gün sonra gənclər “Günəşli” yatağında baş vermiş faciə ilə bağlı Bakı Bulvarında “Dənizə bir qərənfil ataq” adlı aksiya keçirib.
Qeyd edək ki, həlak olmuş neftçilərin xatirəsinin əbədiləşdirilməsi məqsədilə Çilov adasında abidə ucaldılıb. (Azvision)
