“Zirə” mövsümün rekordunu təkrarladı
“Qafqazinfo” PFL-in rəsmi saytına istinadən xəbər verir ki, evdə keçirdiyi XIX turda “İnter”i, XXI turda “Rəvan”ı eyni 2:1 hesabı ilə məğlub edən Adil Şükürovun yetirmələri ilin ikinci səfərində də 2:0-a sevinib. XX turda “Sumqayıt”ı bu hesabla məğlub edən zirəlilər bu dəfə “Xəzər Lənkəran”ın meydanında 3 xalı 2 cavabsız qola əldə edib. Çempionatın I dövrəsində - V-VII turlarda 3 qələbədən ibarət seriyası olan “Zirə” özünün yeni rekordunu müəyyənləşdirib.
Ümumiyyətlə, cari mövsümdə ən uzun qələbə seriyası məhz 4-ə bərabərdir. Bu rekordu təkrarlayan debütantadək iki dəfə “Qarabağ” (II-V və X-XIII turlarda), hərəyə bir dəfə “Qəbələ” (V-VIII turlar) və AZAL (XVI-XIX turlar) belə seriyaya imza atmışdı. XXIII turda “Neftçi”ni qəbul edəcək qəsəbə təmsilçisi qalib gəlsə, mövsümün mütləq rekorduna yiyələnəcək.
