Boks üzrə Dünya Təsnifat Turnirinin iştirakçıları Atletlər Kəndində qalacaqlar
Bu barədə "Report"a Azərbaycan Boks Federasiyasının icraçı direktoru Nağı Səfərov məlumat verib.
Onun sözlərinə görə, 10 gün davam edəcək yarışa üst-üstə 900-dək qonağın qatılacağı gözlənilir. Onların arasında Ermənistan təmsilçiləri olmayacaq. N.Səfərov bütün qonaqların Atletlər Kəndində yerləşdiriləcəyini bildirib. Federasiya rəsmisi fəxri qonaq qismində Beynəlxalq Həvəskar Boks Assosiasiyasının (AİBA) prezidenti Çinq-Kuo Vunun da Bakıya gələcəyini söyləyib.
Azərbaycanı 3 boksçu - Rüfət Hüseynov (49 kq), Kamran Şahsuvarlı (75 kq) və Teymur Məmmədov (81 kq) təmsil edəcək. Qalan 7 çəki dərəcəsində isə artıq lisenziyalar əldə olunub.
Qeyd edək ki, Dünya Təsnifat Turnirinin Qəbələdə keçirilmə variantı da müzakirə olunurdu. Səbəb kimi həmin ərəfədə Bakıda Formula 1 üzrə Avropa Qran Prisinin təşkili ilə əlaqədar qonaqların yerləşdirilməsi baxımından problemlərin olacağı göstərilirdi. Amma yekunda boks turniri iştirakçılarının otellərdə deyil, Atletlər Kəndində yerləşdirilmələri qərara alınıb. Beləliklə, Atletlər Kəndi "Bakı-2015" I Avropa Oyunlarından bir il sonra yenidən idmançıların ixtiyarına verilib.
