Rio-2016: Lorenzo Sotomayor qalib gəldi, Pərviz Bağırov gözləyir
Rinqə ilk olaraq Cavid Çələbiyev çıxıb. 56 kq çəki dərəcəsində mübarizə aparan dəri əlcək ustamız yarışa 1/16 finaldan start verib. Onun rəqibi qazaxıstanlı Kayrat Yeraliyev olub. 1:2 hesabı ilə məğlub olan Cavid çıxışını başa vurub.
Bu döyüşdən 15 dəqiqə sonra daha bir təmsilçimiz yumruğunun gücünü sınayıb. 64 kq çəkidə mübarizə aparan Lorenzo Sotomayor da Olimpiadaya 1/16 finaldan başlayıb. Avropa Oyunlarının qızıl medalçısı debütdə ukraynalı Volodimir Matviçuku mübarizədən kənarlaşdırıb - 3:0. Bu nəticə ilə legioner boksçumuz 1/4 finala yüksəlib.
Gecənin üçüncü matçında Pərviz Bağırov (69 kq) çıxış edəcək. Dünya çempionatının bürünc, Avropa Oyunlarının isə qızıl medalını qazanmış gənc boksçumuz 1/8 finalda Fransa təmsilçisi Sissoko Süleyman Diopla münasibətlərinə aydınlıq gətirəcək. Bu döyüş gecə 01:30-da start götürəcək.
Nəhayət azərbaycanlı bokssevərlər gecəyə bayraqdarımız Teymur Məmmədovun çıxışı ilə yekun vuracaqlar. 81 kq çəkidə döyüşəcək London Olimpiadasının bürünc, Avropa Oyunlarının qızıl medalçısı ikinci matçını keçirəcək. O, 1/8 finalda hollandiyalı Peter Müllenberq ilə üz-üzə gələcək. Gecənin son döyüşü 02:30-da start götürəcək.
