SOCAR DESFA-da pay almaqda maraqlı olduğunu təsdiqləyib
“Reuters” agentliyi xəbər verir ki, bu barədə Yunanıstan Özəlləşdirmə Agentliyi (HRADF) məlumat yayıb.
Məlumatda bildirilir ki, Afina SOCAR-ın DESFA-da 66 %-lik pay əldə etmə variantını nəzərdən keçirib. Avropa İttifaqının (Aİ) tələblərinə uyğun olaraq, bu variantda 17% Yunanıstan hökumətinə və ya üçüncü tərəfə verilir.
HRADF-ın bəyanatında qeyd olunur ki, agentliyin nümayəndələri və “Hellenic Petroleum” şirkəti SOCAR nümayəndələri ilə görüş keçirib. Görüşdə tərəflər sazişin bağlanmasında istəkli olduqlarını təsdiq ediblər.
Görüşdə SOCAR-ın Yunanıstan nümayəndəliyinin baş direktoru Anar Məmmədov, HRADF prezidenti Stergios Pitsiorlas və digəriləri iştirak edib. Tərəflər DESFA-nın SOCAR tərəfindən özəlləşdirilməsində maraqlı olduqlarını bir daha təsdiqləyib.
Tərəflər arasında əldə olunan razılığa əsasən, DESFA-nın SOCAR tərəfindən özəlləşdirilməsi ilə bağlı əməliyyatın müddəti cari ilin dekabrın 21-dək uzadılıb.