Bakıda keçirilən beynəlxalq konfransın 2-ci panelində nəqliyyat və logistika prosedurlarının sadələşdirilməsi mövzusunda müzakirələr aparılıb.
Çıxış edən "Bakı Beynəlxalq Dəniz Ticarət Limanı" QSC-nin baş direktoru Taleh Ziyadov öncə tarixə nəzər salıb.
O, bildirib ki, qədim dövrdə karvan yollarının üstündə təxminən 40 km-dən bir karvansaraylar fəliyyət göstərirdi: "Onları biz 1 ulduzlu otellərə bənzədə bilərik. Daha sonra həmin karvansaraylar inkişaf edərək 2-3 ulduzlu, tədricən isə 4-5 ulduzlu otellərə bənzədilər. Hazırda Azərbaycan 5 ulduzlu yol qovşağında yerləşir. Yaratdığımız limanda da bu üsuldan istifadə etmişik. Bu liman 100 hektar ərazidə yerləşir. Əvvəllər burada karqo aerodromu mövcud olub. Bakı Beynəlxalq Dəniz Ticarət Limanı ilə bağlı Milli Məclisdə qəbul edilmiş qanun çox unikal qanundur. Hətta Dubayda belə bir qanun yoxdur. Bu Xəzər dənizi hövzəsində ən böyük limandır. Onun inşası bir neçə fazadan ibarətdir. May ayında liman 15 milyon ton yük aşırmaq üçün hazır olacaq. Növbəti mərhələdə bu rəqəm 25 milyon tona çatdırılacaq. Bu liman vasitəsi ilə təkcə Çin mallarının daşınmasınında maraqlı deyilik. Mayın 8-11-də Bakıda dəniz limanlarının böyük konfransı keçiriləcək. Burada bir sıra məsələlər müzakirə olunacaq".
Daha sonra çıxış edən “Azərbaycan Dəmir Yolları” QSC-nin sədr müavini Hicran Valehov söyləyib ki, 2010-2020-ci illər ərzində Azərbaycan dəmir yolu təsərrüfatına 5 mlrd. ABŞ dolları məbləğində investisiya qoyulması nəzərdə tutulub. Artıq bu vəsaitin bir hissəsi yatırılıb: "Bu investisiyaları beynəlxalq maliyyə institutları ilə birlikdə qoyulur. Bakı-Boyük Kəsik dəmir yolu xətti yeniləndikcə elektrik sistemi sabit cərəyandan dəyişən cərəyana keçirilir. Konteynerlərin alınması məsələsinə önəm verdiyimiz üçün bu il də bu işlərin davam etdirilməsini nəzərdə tuturuq. Artıq bu məqsədlə dövlət büdcəsindən vəsait ayrılıb". (musavat.com)
