İftixar Piriyev və söyüş müxalifəti - Vaqif Kərimov yazır
Vaqif Kərimov, Respublikanın Əməkdar artisti, aktyor
Xoreoqraf, rəqqas,rejissor, bəstəkar, şair, dramaturq, alim, “teatr xadimi”, təşkilatçı, şair-dramaturq, prodüsser, aktyor, rəssam... və bir çox başqa sənəti də bacardığını iddia edərək, yaradıcılığının geniş əhatəli, özünün isə “hərtərəfli” adam olduğunu cəmiyyətə sırımağa çalışan, İrəvan Teatrının əbədi direktoru İftixat Piriyev bununla çox universal bir adam olduğunu özünə sübut edib, Ginnesin rekordlar kitabına düşməyə çalışır.
Lakin bu adların hamısını özünə yaraşdırdığına baxmayarq, əsasən teatrlarda çalışan texniki işçilərin aldığı və onun da layiq bilindiyi əməkdar mədəniyyət işçisi fəxri adı ürəyincə deyil. İstəyi daha yüksək fəxri ad almaqdır. Ona görə də layiq olduğuna qane olmaq istəmir. Arzusu isə elə arzu olaraq qalır. Bu səbəbdən yüksək fəxri ad alan sənətkarlara qarşı içində baş qaldıran paxıllıq hissini nə qədər çalışsa da, boğa bilmir ki, bilmir.
İrəvan Teatrının və Azərbaycan kinosunun inkişafında əvəzsiz xidmətləri olan əməkdar artist Vidadi Əliyevin Xalq artisti fəxri adına layiq görülməsi İ.Piriyevi içindəki çirkabı püskürməyə, maskasını cırıb qapağını açaraq, geniş içtimaiyyətə göstərməyə məcbur etdi. Özünün qatı açılmamış söyüşlərdən üfunət qoxusu verən feyzbuk səhifəsində status yazaraq Xalq artisti Vidadi Əliyevi leksikonuna hakim kəsilmiş söyüşlərlə təhqir etdi. Cənab Prezidentin təltif etdiyi, atası yaşında olan, 75 yaşlı Xalq artistini dələduz, meymun, erməni, “pyaniska”, “moşennik” adlandırmaqdan çəkinmədi. Hətda fəxrlə onun soyadının Əliyev yox Abezyan olduğunun da ona xəbər verildiyini elan etdi. “Kəşfiyyat xarakterli gizli” məlumatı hansı mənbədən aladığını isə açıqlamadı. Yəqin, sirr vermək istəmədi. Amma hamıya məlumdur ki, belə məlumat ancaq ermənilərdən ötürülə bilərdi. Çünki Vidadi Əliyev uzun illər İrəvanda yaşayıb. O, soyadını dəyişibsə, bu barədə məlumat ancaq Ermənistanın xüsusi xidmət orqanlarında ola bilərdi. Bura qədərini anlaya bilib. Ağlına da gəlmədi ki, onun bu yalanla yoğrulmuş qarayaxma cəhdi cənab prezidentin hörmət edərək, qiymətləndirərək fəxri ada layiq gördüyü sənətkarı təhqir etməklə bərabər, həm də prezidentimizin verdiyi ali sərəncama kölgə salmaq çəhdidir. Məqsədi nədir Piriyevin? Bəlkə, o düşünür ki, cənab prezident kimi mükafatlandırdığının fərqində deyil? Bəlkə, öz ağlı ilə fikirləşir ki, dövlətimizin təhlükəsizlik orqanları işlərini günün tələbləri səviyyəsində qurub, soyadlarını dəyişərək “içimizə soxulmuş erməniləri” vaxtında aşkarlamaqda acizdirlər?
İftixar Piriyev
Cənab prezidentin sənətkarlar haqqındakı sərəncamlarının doğruluğuna şübhə ilə yanaşmaq Piriyevin xəstəliyidir. Çörəyini yeyib, haqqında mədhiyyə şeirləri yazdığı, hesabına evli-maşınlı adam olduqdan sonra üzünə ağ olduğu, mədəniyyətimizin inkişafında danılmaz xidmətləri olan yüksək çinli məmur ali ordenlə təltif ediləndə də Piriyev dözmədi. İçindəki qurdlar vurub üzünə çıxdı. “Yalvarıb orden aldın” yazaraq onu ağlagəlməz söyüşlərlə “təbrik” elədi. Haqqında nalayiq sözlərlə dolu olan “poema” yazdığını aləmə car çəkib şantaj eləməkdən də çəkinmədi. Nə demək istəyir İ.Piriyev? Demək istəyir ki, kim yalvarırsa ordeni ancaq o ala bilir? Yoxsa prezident ordenlə mükafatlandırdığı adamın vətən qarşısındakı xidmətlərini yox, nə dərəcədə yalvardığını nəzərə alır? Dövlət məmuru İ.Piriyev bu təxribatçı hərəkəti ilə yenə də cənab prezidentimizin mükafatlandırma haqqında olan sərəncamının doğruluğunu, obyektivliyini şübhə altına salmağa çalışdı.
Azərbaycan xalqının dünyaca məşhur oğlu Rüstəm İbrahimbəyov Bakıya gəlir, yüksək hörmətlə qəbul olunur, görüşlər keçirir, müsahibələr verir, Piriyev isə İrəvan Teatrının kollektivini özünün şəxsi ambisiyalarına qurban verərək, toplayıb iclas keçirir, məhkəmə sədri kimi “qərar” qəbul edərək İbrahimbəyovu “Xalq düşməni” elan edir onun həbs olunmasını tələb edir. Kimin dəyirmanına su tökür? Kimdn tapşırıq alır? Bəlkə, son vaxtlar adı onunla bir yerdə çəkilən, azərbaycanlı ziyalıların və xalqımızın düşməni, uşaq qatili Zori Balayandan?
İ.Piriyev prezidentin “Məmur sadə insanların xidmətində durmalıdır. Onları incitməməlidir!” tapşırıqlarına məhəl qoymayaraq, saxta sənədlər tərtib edərək “rejissorluq” edib “oyunlar” qurmağı, hamilə qadını işdən çıxarıb onu stress vəziyyətinə salmaqla uşağını itirməyə zəmin yaratmağı, insanları maaşsız, işsiz, çörəksiz qoymağı yaxşı bacarır. Bundan artığına yaramır. Özünü teatrda şah kimi aparır, amma teatrı kəndxuda kimi idarə edir. “Anam mənə kor deyib, gəlib gedəni vur deyib” psixologiyasından əl çəkə bilmir. Çünki səviyyəsi, düşüncəsi, savadı, “alimliyi”, davranışı “at öğrusuna” məxsus olan səviyyədən də aşağıdır. Belə olmasaydı, hörmətli prezidentimizin fəxri adlara layiq gördüyü insanları söyməzdi, təhqir etməzdi. Cəmiyyətə bu adamların fəxri adlara layiq olmadığını sübut etməyə çalışmazdı.
İ.Piriyevin məmura yaraşmayan, ancaq küçə adamına yaraşan söyüş leksikonu var. Söyüş söyməyi özünə peşə davranışına çevirib. Yüksək səviyyədə mükafatlandırılmış hörmətli adamlar haqqında hədyanlar yağdırır. Sual olunur: İ.Piriyev hörmətli insanları söyməklə, anti- Azərbaycan dairələrin, o cümlədən ermənilərin sifarişi ilə ölkəmizin hörmətli adamlarını murdar söyüşlərlə söyən, erməni xislətlilərdən nə ilə fərqlənir? Bəlkə onlarla eyni məqsədə qulluq edir? Bu hərəkətləri sübut edir ki, İ.Piriyev Avropada fəaliyyət göstərən söyüş müxalifətinin üzvüdür və daha təhlükəlidir. Çünki dövlət məmurudur. Vəzifə səlahiyyətlərini aşıb, ətrafına topladığı özü təfəkkürdə olan dəstəsiylə oyunlar qurmaqla işdən çıxardığı adamları dövlətdən narazı salıb müxalifətin düşərgəsinə atıb, onların çaldığı havaya oynamağa məcbur etmək istəyir. Çox təhlükəli və məkrli bir plandır. Deyilmi? Son günlər, mədəni səviyyədə diskussiya aparmağa savadları çatmadığından söyüş söyməklə insanları təhqir edən “söyüş söyənlər” bandasının bəzi üzvləri İ.Piriyevin göstərişi ilə məni - prezident tərəfindən Əməkdar artist fəxri adına layiq görülmüş Vaqif Kərimovu nişan alıblar. Qarabağda erməni gülləsindən qorxmayan bir qazi aktyoru boş və mənasız sözlərlə qorxutmaq istəyirlər. Amma onların bu cəhdləri və arzuları alınmayacaq. Çünki qanunsuz olaraq işdən çıxardığı adamların hamısı xalqını, dövlətini, prezidentini sevən insanlardırlar, İ.Piriyev və “ söyüş söyənlər” dəstəsindən fərqli olaraq yalançı vətənpərvər yox, əsl vətənpərvərdirlər. Ona görə də vətənpərvər olduqlarını harda gəldi bağırmırlar. Çünki məhz belə olduqlarını bilirlər. İ.Piriyev isə daxildə vətənpərvər olmadığını çox yaxşı bilir. Ona görə də yalandan, əyalət təfəkküründən istifadə edib özünü çox köntöy, yonulmamış halda təbliğ edir. Hamının ona gülərək rişxənd etdiyini isə anlamaqdan çox uzaqdır. Çünki təfəkkürü “zapçast alverçisi” təfəkürüdür. Adam nə qədər bağırar? Kimə, nəyi sübut etməyə çalışırsan? Düz iki ildir ki, mətbuatda gedən yazılarda İ.Piriyevin psixi durumunun yerində olmadığı qeyd edilir. Bu adamın qarşısı alınmasa İrəvan Teatrında pis işlərin baş verəcəyi mətbuat vasitəsiylə aidiyyatı orqanlara çatdırılır. Zaman bu sözlərin doğru olduğunu sübut etdi. İ. Piriyev bir gənc ananın, İrəvan Teatrının aktrisası Şəbnəm Cəbrayılovanın uşağını itirməsinə bais oldu. Bundan faciəvi hadisə olmalıydı ki? Sabah çox güman ki, yenə kiminsə ölümünə bais olacaq. Zaman göstərəcək. Amma niyə indidən bunun qarşısı alınmasın? Axı niyə yarıtmaz bir məmurun mədəniyyətimizin tarixinə qara ləkələr yazdığına dözməliyik?
Mədəniyyət naziri hörmətli Əbülfəs Qarayevə müraciət edirəm. Hörmətli nazir! Tabeçiliyinizdə işləyən məmur İftixar Piriyev sosial şəbəkələrdəki fəaliyyəti ilə tabe olduğu nazirliyin bütün əməkdaşlarının və şəxsən sizin bir rəhbər kimi hörmətinizə ləkə gətirir. İnanın ki, bütün cəmiyyət belə düşünür. Müvafiq orqanlara müraciət edirəm. Azərbaycan Respublikasının Prezidenti tərəfindən ali sərəncamlarla mükafatlara layiq görülmüş insanları təhqir etdiyinə, mükafata layiq olmadıqlarını cəmiyyətə bəyan etməklə prezident sərəncamlarının ədalətli, obyektiv olduğunu şübhə altına salmağa çalışaığına, ölkəmizin bütün qanunlarını pozaraq hamilə qadını işdən azad edərək onun uşağının itirməsinə bais olduğuna görə, İrəvan Teatrının direktoru İ.Piriyevin ictimai fəaliyyəti araşdırılsın. Söyüş müxalifətinin dəyirmanına su tökən, öz hərəkətləri ilə ziyalı adına, üzvü olduğu YAP-ın bütün üzvlərinin adına ləkə yaxan, adi məişətdə belə hərəkətlərinə cavabdehlik daşıya bilməyən bu dövlət məmuruna “dəli köynəyi” geyindirməyin vaxtıdır.
Redaksiyadan: Yazıda qeyd edilənlərlə bağlı qarşı tərəfin cavab haqqını tanıyırıq.
