Dünya əhalisinin 92%-i çirkli havayla nəfəs alır
Sentyabrın 27-də Dünya Səhiyyə Təşkilatı yer üzündə havanın çirkliliyi ilə bağlı yeni interaktiv xəritə təqdim edib. Xəritə süni peyklərin və yerüstü stansiyaların dünyanın 3000 nöqtəsində (həm şəhər, həm də kənd yerlərində) qeydə aldığı məlumatlara əsaslanır. Bu məlumatlar beş il ərzində (2010-2015) toplanıb.
İnteraktiv xəritədə göstərilir ki, Yer kürəsi əhalisinin 92-%-i havası çirkli olan bölgələrdə yaşayır. Yer üzündə yalnız 10 adamdan biri havası Dünya Səhiyyə Təşkilatının müəyyən etdiyi standarta cavab verən məkanlarda məskunlaşıb.
Dünya Səhiyyə Təşkilatının araşdırmasına görə, hər il 3 milyon nəfərədək insan açıq məkanlardakı havanın çirklənməsi səbəbindən ölür. Qapalı yerlərdə də havanın çox təhlükəli olduğu vurğulanır.
2012-ci ildə 6,5 milyona qədər adam (dünya üzrə ölənlərin 11,6%-i) evlərdə və küçələrdə havanın çirkli olması ucbatından ölüb. Onların 90%-i əhalisi aşağı və orta səviyyədə yaşayan ölkələrin vətəndaşları olub.
Dünya Səhiyyə Təşkilatının araşdırmasına görə, havası ən çox çirklənən ölkələr Yaxın Şərqdə və Asiyada yerləşir.
Təşkilatın baş direktor köməkçisi Flaviya Bustero qeyd edib ki, havanın çirklənməsi əhalinin daha zəif təbəqəsinin – qadınların, uşaqların və qocaların həyatını məhv edir.
