“Saxta yollarla yardım alanları aşkarlayıb tapırıq” - nazir


“Saxta yollarla yardım alanları aşkarlayıb tapırıq” -


"Ünvanlı sosial yardımla bağlı davamlı monitorinqlər aparılır. Artıq 2000-dək şəxsə ünvanlı sosial yardım ödənilməsi dayandırılıb".



Modern.az-ın məlumatına görə, bunu jurnalistlərə açıqlamasında Əmək və əhalinin sosial müdafiəsi naziri Sahil Babayev bildirib. Nazir qeyd edib ki, onlara ödənmiş vəsaitlərin tutulmasına və bərpa edilməsinə başlanılıb:

“Burada da analoji yoxlama meyarlarından istifadə edirik. Yəni bu gün biz səyyar yoxlama metodlarından tam kənar şəkildə, elektron audit üzərində iş qurmuşuq. Monitorinqlər nəticəsində ünvanlı sosial yardım təyinatından sonra qısa müddət ərzində bir sıra şəxslərin əmək müqavilələrinin ləğv edilməsi, sosial sığorta ödənişlərinin həyata keçirilməməsi və digər şübhəli hallar meydana çıxır. Məsələn, ən son meydana çıxan hallardan biri budur ki, bir fiziki şəxsin imzaladığı əmək müqavilələri nəticəsində onunla muzdlu əmək müqaviləsinə malik 170-dən çox şəxs ünvanlı sosial yardım alır. Yəni bir fiziki şəxs, bir kiçik şirkət çərçivəsində 170 ünvanlı sosial yardım alan şəxsin olması və onlarla imzalanmış əmək müqaviləsinin 3-5 gün, 1 həftə sonra ləğv edilməsi birbaşa onu göstərir ki, bu, elektron sistemlərə saxta informasiyaların ötürülməsi üçün görülən tədbirlərdir. Bu şəxslərin ünvanlı sosial yardımı ləğv edilib və həmin işbazlar barəsində də müvafiq tədbir görülməsi üçün hüquq-mühafizə orqanlarına müraciət edilir”.
S.Babayevin sözlərinə görə, bu proses davamlı olacaq və elektron monitorinq çərçivəsində saxta yollarla ünvanlı sosial yardım almağa başlamış şəxslərlə bağlı tədbirlər görüləcək.

Nazir bildirib ki, bu gün təqribən 70 min ailəyə ünvanlı sosial yardım ödənilir, bu isə 280 min insanı əhatə edir: "Onların da yarıdan çoxunu uşaqlar təşkil edir. Ödənilən məbləğin ailə başına orta rəqəmi 200 manatın üzərindədir. Bu kifayət qədər ciddi resursdur. İl ərzində təkcə ünvanlı yardım vasitəsilə vətəndaşlara ödəniləcək məbləğ 170 milyon manatdır".



AFN.az
Redaksiyamızla əlaqə: tel; 070 372 99 90, E-mail:office@afn.az



menyu
menyu