Milyarderin azərbaycandakı bankında yoxlamalar!- Palata “Nikoil Bank”da nə axtarır?

Xəbərin çap versiyası
Tarix: 14-11-2017, 11:39    |    Xəbər oxunub: 575 dəfə
Milyarderin azərbaycandakı bankında yoxlamalar!-


Maliyyə Bazarlarına Nəzarət Palatası Vahid Ələkbərovun bankında maxinasiyaların izinə düşüb



Maliyyə Bazarlarına Nəzarət Palatası azərbaycanlı milyarder, "Lukoyl” şirkətlər qrupunun prezidenti Vahid Ələkbərova məxsus "Nikoil Bank” ASC-də kompleks yoxlamalara başlayıb.

Etibarlı mənbədən "AzPolitika”ya daxil olan məlumata görə, ötən həftənin əvvəlindən başlayan araşdırmalar bankda geniş miqyaslı maxinasiyalar, vəsaitlərin talan edilməsi və beləliklə mövcud qanunvericiliyin kobud şəkildə pozulması ilə bağlıdır. Mənbə bildirib ki, ötən il Vahid Ələkbərov tərəfindən bankın kapitalının 160 milyon manat civarında artırlmasına baxmayaraq, "Nikoil Bank” uğursuzluq zolağından nəinki çıxa bilməyib, əksinə, üzləşdiyi zərərin miqyası artıb, problemli kreditlərin həcmi böyüyüb.

Məlumatda qeyd olunur ki, bütün bunların səbəbi Bankın rəhbərləri-İdarə Heyətinin sədri Nikolay Şurqaya və onun birinci müavini Fərhad Hacınskinin yarıtmaz fəaliyyəti ilə bağlıdır. Hər iki şəxsin "Nikoil Bank”a "Rabitəbankdan” gəldiyinə diqqət çəkən mənbə, həmin bankın çox ciddi problemlərlə üzləşdiyini, hazırda kredit portfelinin 70 faizindən çoxunun problemli olmasını vurğulayıb. Həmin kommersiya qurumunda da Nikolay Şurqayanın müavini kimi fəaliyyət göstərən Fərhad Hacınski, yaratdığı ciddi problemlərə görə qovulduqdan sonra təxminən ilyarım işsiz qalıb. Amma Nikolay Şurqaya onun dadına çatıb və Hacınski "Nikoil Bank”da yüksək posta gətirilib.

Mənbə onunla bağlı daha bir maraqlı fakta diqqət çəkir: Hacınski Tibb Universitetinin məzunudur, heç bir iqtisad təhsili yoxdur, bu avtomatik olaraq sədr müavininin bank sistemində yüksək post tutmasını əngəlləyir, çünki qanunvericiliyin tələbi belədir. O zaman Mərkəzi Bank və Maliyyə Bazarlarına Nəzarət Palatası onun ölkənin ən böyük banklarından birində vəzifə tutmasına necə göz yumub? Bu, "Nikoil Bank”da yeganə hal deyil. Məsələn, Bankın Hüquq Departamentinin sədri Vüqar Kərimovun da hüquq təhsili yoxdur.

Şurqaya-Hacınski komandasının "Nikoil Bank”a transferindən əvvəl bu kommersiya qurumunda ciddi problemlər baş verib. Bankın İdarə Heyətinin əvvəlki sədri Vasili Xamaza banka məxsus 40 milyon manatdan çox vasaiti talan edib və onun barəsində Baş prokuror yanında Korrupsiyaya Qarşı Mübarizə Baş İdarəsində cinayət işi açılıb. Hazırda V. Xamaza axtarışdadır. Mənbənin bildirdiyinə görə, Azərbaycan vətəndaşı olmayan Xamaza dələduzluq, mənimsəmə, saxtakarlıq və s. cinayətlərdə ittiham olunur.

Maraqlıdır ki, onun əməllərini davam etdirən sələfi Nikolay Şurqaya da Azərbaycan vətəndaşı deyil. O və müavini Hacınskinin başqa bir "özəlliyi”də Azərbaycanın əlamətdar günlərinə, həmçinin 20 yanvar, Xocalı faciəsi ilə bağlı anım mərasimlərinə qatılmaqdan imtina etmələridir. Mənbə bildirib ki, onlar hətta mərhum prezident Heydər Əliyevin xatirəsinin anım günlərinə də qatılmayaraq belə tədbirlərin onlar üçün sadəcə "maraqsız” olduğunu deyirlər.

Maliyyə Bazarlarına Nəzarət Palatasının "Nikoil Bank”da apardığı kompleks yoxlamaların səbəbinə gəlincə, mənbə maraqlı faktlar açıqlayıb.

Son il yarımda banka gətirilən kadrların əksəriyyəti digər banklardan kənarlaşdırılan, qeyri-peşəkar, uzun müddət işsiz qalmış şəxslərdən ibarətdir. Paralel olaraq bankın təcrübəli işçiləri müxtəlif bəhanələrlə işdən uzaqlaşdırılır.

Bankda təftiş olunan əsas problemlərdən biri "şapka” əsasında gürcü millətindən olan maklerlərə kreditlərin verilməsidir. Mənbə bildirib ki, yüksək məbləğli bank vəsaitləri təhlil olunmadan bir günün içində sədrin "məsləhət gördüyü” şəxslərin adlarına kredit kimi rəsmiləşdirilir. Belə "gəlirli” işlər Bankın Koorporativ Kredit Departamentinin sədri İlqar Tağıyevin rəhbərliyi ilə həyata keçirilir. Onun kuratoru isə İdarə Heyəti sədrinin birinci müavini Fərhad Hacınskidir.

Mütəmadi həyata keçirilən bu "kredit xətti” bankda gürcü iş adamları-İlqar Tağıyev-Hacınski-Şurqaya iş birliyini göstərən korrupsiya mexanizmlərindən biridir.

Mənbə "Nikoil Bank”da rəhbərliyin hüdudsuz qazanc əldə etdiyi daha bir "xəttə” işıq salır. Belə ki, problemli kreditlərin təminatı olan əmlaklar balansa götürüldükdən sonra baha qiymətə satılır. Amma banka əldə olunan vəsaitin kiçik bir hissəsi mədaxil edilir, qalan pullar isə rəhbərlik tərəfindən mənimsənilir. Bu "gəlirli” sahəni isə Fərhad Hacınskinin ən yaxın adamlarından biri olan Cəlal Nağıyev kurasiya edir. İdarə Heyəti sədrinin müavini onun əli ilə guya kollektor fəaliyyəti ilə məşğul olan fiziki şəxslərlə müqavilələr bağlayır və hər ay onların hesablarına pul köçürərək bankdan çıxarılır.

Məlumatda qeyd olunur ki, heç bir təhlil aparılmadan verilən kreditlərin təyinatı üzrə istifadə olunub-olunmamasına nəzarət olunmur. Bu kreditlərin rəsmiləşdirilməsindən əldə olunan rüşvətlər müştərinin hesabından bank əməkdaşlarının ya başqa banklarda, ya da "Nikoil Bank”da açdıqları hesablara köçürülərək nağdlaşdırılır. Bütün bu qara əməliyyatlar isə Palatanın apardığı yoxlamaların əsas predimetlərindən biridir.

Mənbənin məlumatına görə, "Nikoil Bank”da baş verən talançılıqdan bankın London ofisindən Marina Kluşova da xəbərdardır. Onun Nikolay Şurqaya ilə korrupsiya əlaqələrinin olduğu barədə məlumatlar var.

Maraqlıdır, Palatanın apardığı yoxlamalardan sonra Vahid Ələkbərovun on milyonlarla vəsaiti etibar etdiyi Şurqaya-Hacınski komandası sələfi Vasili Xamazanın aqibətini yaşayacaqmı? Milyarder korrupsiya yeminə çevrilən vəsaitlərini xilas etmək üçün hansı tədbirləri görəcək?

Qeyd edək ki, əldə olunan bu məlumatlarla bağlı "Nikoyl Bank”ın rəhbərliyinin mövqeyini öyrənmək üçün banka şifahi və yazılı sorğu versək də, "müvafiq vəzifəli şəxsin” suallarımıza cavab vermək üçün bizimlə əlaqə saxlayacağı haqda vəd, elə vəd olaraq da qaldı. Bununla belə, "Nikoyl Bank”ın mövqeyini işıqlandırmağa hazır olduğumuzu bildiririk.



AFN.az
Redaksiyamızla əlaqə: tel; 055 260 69 84, e-mail afn.news@mail.ru




Diqqətinizi çəkə biləcək digər xəbərlər
Tanınmış jurnalist Natiq Qədimov vəfat edib

Tanınmış jurnalist Natiq Qədimov vəfat edib

Az qala banklara yalvarırıq-

Az qala banklara yalvarırıq- Qənirə Paşayeva

“Ermənistan “dəvəquşu siyasəti”nə son qoymalıdır”-

“Ermənistan “dəvəquşu siyasəti”nə son qoymalıdır”- XİN

“Onlayn mediaya 1 milyon ayrılsın” -

“Onlayn mediaya 1 milyon ayrılsın” - deputatdan təklif

Əmək pensiyaları artırılacaq-

Əmək pensiyaları artırılacaq- rəsmi

MSK sədri prezident seçkilərindən danışdı

MSK sədri prezident seçkilərindən danışdı

Ramiz Mehdiyev MDB-dəki problemləri müzakirə edib

Ramiz Mehdiyev MDB-dəki problemləri müzakirə edib

“Hökumət büdcəyə görə məsuliyyət daşıyır”-

“Hökumət büdcəyə görə məsuliyyət daşıyır”- Valeh Ələsgərov

DİN Qaradağdakı avtobus qəzası ilə bağlı məlumat yaydı

DİN Qaradağdakı avtobus qəzası ilə bağlı məlumat yaydı

Parlamentdə maliyyə amnistiyası təklif edildi

Parlamentdə maliyyə amnistiyası təklif edildi

İnsanların icbari tibbi sığortaya ehtiyacı var-

İnsanların icbari tibbi sığortaya ehtiyacı var- millət vəkili

Telman İsmayılov Fransadan siyasi sığınacaq istədi

Telman İsmayılov Fransadan siyasi sığınacaq istədi

    Saytdakı materialların istifadəsi zamanı istinad edilməsi vacibdir. Məlumat internet səhifələrində istifadə edildikdə hiperlink vasitəsi ilə istinad mütləqdir.
    Təsisçi və baş redaktor Səbuhi Qafarov, baş direktor Həbibə Abdulla.
 

Copyright © 2012-2017 AFN.az Bu layihə AFN MMC məhsuludur