Turistlərin sığortalanmasına çox az diqqət yetirilir- Assosiasiya narahatdır


Turistlərin sığortalanmasına çox az diqqət yetirilir-


Hotellər və Restoranlar Assosiasiyası ölkədə daxili turist və ekskursant kimi səfərə çıxan insanların sığortalanmaması faktından narahatlığını bildirir.



Daxili turistlər xaricə üz tutan turistlərlə yanaşı müxtəlif fors-major və təhlükələrlə üzləşə bilərlər. Buna baxmayaraq ölkənin regionlarına səfər edən turistlər arasında sığortalananların sayı olduqca azdır.

Turistlər səfər zamanı onların səhhətinə, əşyalarına vurulan hər hansı ziyanla və yaxud digər şəxslərə eytiyyatsızlıqdan vura bildiyləri zərərlə üzləşdiyi zaman həm özlərinə, həm də turizm agentliyinə, nəqliyyat şirkətinə, yerləşdiyi otelə problemlər yarada bilər. Bu risklərin minimuma endirilməsinin üsullarından biri də sığortadır.

Assosiasiyanın araşdırmasına görə güvvədə olan “Turizm haqqında” və “Sığorta fəaliyyəti haqqında” AR Qanununlarında turistlər üçün nəzərdə tutulmuş səfər sığortasına çox az diqqət yetirilir. Xüsusilə bu fakt daxili turistlərə aiddir.

Bu Qanunlarda səfər sığortası anlayışı açıqlanır və turistin sığortalanmasına, yalnız onun tələbilə, turizm şirkətləri tərəfindən köməklik göstərilməsi qeyd edilmişdir. Azərbaycan Respublikasının Mülki Məcəlləsinin 50-ci fəsilində isə səfər sığortası haqqında heç bir qeydlər göstərilməyiblər.

Hazırda qəbul edilməsi gözlənilən “Turizm haqqında” AR Qanunun layihəsində turistlərin təhlükəsizliyinə və turizm sahəsində istehlakçıların sığortalanmasına dair müvafiq maddələr ayırılmışdırlar. Yalnız yeni Qanunda da daxili turistlərin və ekskursantların sığortalanmasına az diqqət yetirilir.

Assosiasiya bir sıra sığorta şirkətlərinə müraciət etmiş və turistlərin səfər sığortası üçün hansı təkliflərinin olmasını da araşdırmışdır. Demək olar ki, əksər qabağcıl sığorta şirkətləri xaricə gedən turistlər üçün xidmətlər təklif edirlər. Yalnız daxili turistlər və ekskursantlar üçün xüsusi sığorta xidmətlərinin təklifləri azlıq təşkil edir. Bir çox sığorta şirkətləri belə xidmətləri ümumiyyətlə təklif etmirlər. Digər sözlə desək bu növ sığorta məhsulları belə şirkətlər tərəfindən hazırlanmayıblar. Bu isə onu göstərir ki, bu cür xidmətlərə turizm bazarında maraq olduqca aşağıdır.

Assosiasiya sığorta bazarında fəaliyyət göstərən SSB broker şirkətinə də müraciət etmiş və adı gedən məsələ ətrafında müzakirələr aparmışdır. Əldə olunmuş razılığa əsasən sığorta brokeri Assosiasiyanın xahişi ilə sığorta şirkətlərinə müraciət etmiş və yalnız onların bir neçəsindən daxili turistlər üçün nəzərdə tutulmuş sığorta paketləri təkliflərini almışdır. Bu təkliflər nəzərdən keçirildikdə məlum olmuşdur ki, bir gün üçün paketlər 1-3 AZN arası qiymətinə təklif edilirlər. Yalnız bu təkliflər də daxili turistlər üçün xüsusi səfər sığortası deyillər və daha çox könüllü tibbi sığorta kimi izah edilirlər.

Hotellər və Restoranlar Assosiasiyasının Sədri Samir Dübəndi qeyd edir ki, “Ölkə daxilində səyahət edən turistlər və ekskursantlar üçün xüsusi səfər sığortası paketləri turizm bazarı üçün önəmlidirlər. İl ərzində regionlara üz tutan səfərlərin sayı təxminən 800 mindir. Hesab edirəm ki, bu rəqəm sığortaçılar üçün maraq kəsb etməlidir. Qeyd etmək lazımdır ki, daxili turistlərin sığortalanmasına qanunlarda və digər normativ sənədlərdə xüsusi diqqət yetirilməlidir. Turistlərin sığortalanması icbari xarakter daşısa biz bir çox xoşa gəlməz fəsadlardan həm turistləri və eyni zamanda onlara xidmətlər satan şirkətləri qoruya bilərik. Aktiv istirahət, ovçuluq, ekstrim, alpinizm və bu kimi turizm növlərində isə sığorta məsələləri daha çox diqqət mərkəzində olmalıdırlar.”

Assosiasiya ilə SSB sığorta brokeri arasında əldə edilmiş razılığa əsasən xüsusi səfər sığortasının realizəsi istiqamətində iş davam edəcək. İlkin razılığa əsasən turizm sığorta portalının yaradılması da nəzərdə tutulur.

Hotellər və Restoranlar Assosiasiyası aidiyyatı qurumları qeyd olunan məsələyə daha diqqətli olmalarına çağırır.



AFN.az
Redaksiyamızla əlaqə: tel; 070 372 99 90, E-mail:office@afn.az



menyu
menyu