Qlobal bazarlarda müsbət dinamika: Texnologiya səhmləri və istiqraz bazarında canlanma
Qlobal maliyyə bazarlarında istiqraz gəlirliliyinin azalması və texnologiya səhmləri üzərində satış təzyiqinin zəifləməsi nəticəsində investorların risk iştahı artıb.
AFN.az xəbər verir ki, ABŞ-dan açıqlanan makroiqtisadi göstəricilər, istiqraz bazarındakı dəyişikliklər və texnologiya şirkətlərinin səhmlərinin dinamikası dünya bazarlarının istiqamətinə təsir göstərməkdə davam edir.
ABŞ-da istehsalçı qiymətləri indeksi sentyabr ayında aylıq 1,3 faiz, illik isə 6,3 faiz artaraq gözləntiləri üstələyib. Ölkədə istehsalçı inflyasiyası aylıq ifadədə 2022-ci ilin martından, illik ifadədə isə həmin ilin dekabrından bəri ən yüksək səviyyəyə çatıb.
ABŞ-da istehlak qiymətləri indeksi üzrə açıqlanan məlumatlardan sonra istehsalçı qiymətlərinin də sürətlə artması qiymət təzyiqlərinin uzunmüddətli xarakter ala biləcəyi ilə bağlı narahatlıqları gücləndirib.
İnflyasiyanın hədəf səviyyəsindən yüksək qalması fonunda ABŞ Federal Ehtiyat Sisteminin (FED) yeni faiz artımlarına gedə biləcəyi ilə bağlı gözləntilər ön plana çıxır. ABŞ-da pərakəndə satışların sentyabrda aylıq 0,8 faiz artaraq proqnozları üstələməsi də FED-in sərt pul siyasətini davam etdirəcəyi ilə bağlı gözləntiləri gücləndirir.
Yüksək faiz dərəcələrinin süni intellektə yatırımlara mənfi təsir göstərə biləcəyi ilə bağlı narahatlıqlar səbəbindən dünən texnologiya səhmlərində müşahidə olunan satış təzyiqi FED sədri Kevin Uorşun süni intellekt sahəsi ilə bağlı nikbin qiymətləndirmələrindən sonra bu gün yerini bərpa meylinə verib.
Digər tərəfdən, texnologiya sektoruna dair narahatlıqların davam etməsi və iqtisadi artımla bağlı riskləri artırması investorların istiqrazlara yönəlməsinə səbəb olub.
Bu vəziyyət istiqraz gəlirliliyinin azalmasına təsir göstərib. Dünən 11 baza bəndi azalaraq 5,19 faizdən 5,08 faizə düşən ABŞ-ın 10 illik dövlət istiqrazlarının gəlirliliyi bu gün əsasən sabit qalır. İstiqraz bazarında satış təzyiqinin zəifləməsi səhm bazarlarına da müsbət təsir göstərib.
İstiqraz bazarında satış təzyiqinin azalması fonunda dollar indeksi 0,2 faiz geriləyərək 101,9 səviyyəsində qərarlaşıb. Qızılın bir troya unsiyası isə əvvəlki bağlanış səviyyəsindən bir qədər yuxarıda, 4 171 dollardan ticarət olunur.
Beynəlxalq Enerji Agentliyinin (IEA) mart ayında razılaşdırılmış rekord həcmdə təcili ehtiyat buraxılışından qalan neftlə yanaşı, bazara 20 milyon bareldən çox dizel yanacağının çıxarılması barədə razılığa gəldiyi ilə bağlı xəbərlər fonunda dekabr fyuçersləri üzrə Brent neftinin bir barelinin qiyməti 0,5 faiz azalaraq 105,4 dollar olub.
Digər tərəfdən, ABŞ Maliyyə Nazirliyi İranın beynəlxalq maliyyə sisteminə çıxışını məhdudlaşdırmaq məqsədi daşıyan sanksiyalar çərçivəsində İranla əlaqəli 16 fiziki şəxsi və 10 qurumu sanksiya siyahısına əlavə edib.
New York birjasında dünən texnologiya şirkətlərinin səhmlərinin ucuzlaşmasına baxmayaraq, səhiyyə sektorunda fəaliyyət göstərən şirkətlərin səhmlərinin bahalaşması nəticəsində müsbət dinamika müşahidə olunub.
Nvidia səhmləri təxminən 2 faiz, AMD səhmləri 1,5 faiz, Intel səhmləri isə təxminən 3 faiz ucuzlaşıb.
Səhiyyə sektorunda Eli Lilly səhmləri 3,5 faiz, UnitedHealth səhmləri 2,8 faiz, pərakəndə satış nəhəngi Walmart-ın səhmləri isə 1,5 faiz bahalaşıb.
Barclays analitikləri SpaceX və Tesla şirkətlərinin yüksək vəzifəli rəhbərlərinin birləşmə imkanlarını nəzərdən keçirdiklərinə dair əlamətlər gördüklərini bildiriblər. SpaceX səhmləri 2,3 faiz, Tesla səhmləri isə 1,3 faiz dəyər itirib.
Makroiqtisadi göstəricilərə gəlincə, ABŞ-da ilk dəfə işsizlik müavinəti üçün müraciət edənlərin sayı oktyabrın 10-da başa çatan həftədə 199 minə yüksəlib. Bu göstərici bazar gözləntilərinə uyğun olub.
Bu hadisələrin fonunda Dow Jones indeksi 1,08 faiz, S&P 500 indeksi 0,33 faiz, Nasdaq indeksi isə 0,08 faiz yüksəlib.
ABŞ-da fond indeksləri üzrə fyuçers müqavilələri yeni günə artımla başlayıb.
Şirkətlərin açıqladığı güclü maliyyə hesabatları və səhiyyə sektorunda fəaliyyət göstərən şirkətlərin səhmlərinin bahalaşması fonunda İtaliya istisna olmaqla, Avropa birjalarında müsbət dinamika qeydə alınıb.
Makroiqtisadi göstəricilərə əsasən, Böyük Britaniyada avqust ayı üzrə iqtisadi artım aylıq 0,1 faiz, illik isə 2,1 faiz olmaqla gözləntiləri üstələyib. Dünən açıqlanan artım göstəricilərindən sonra funt sterlinqin ABŞ dollarına nisbətdə məzənnəsi bu gün 1,33 səviyyəsinə yüksələrək sentyabrın 30-dan bəri ən yüksək həddə çatıb.
Digər tərəfdən, Avrozonada avqust ayı üzrə sənaye istehsalı aylıq 0,5 faiz, illik isə 1,1 faiz azalaraq proqnozlardan daha zəif nəticə göstərib.
Bu hadisələrin fonunda Almaniyanın DAX 40 indeksi 0,33 faiz, Böyük Britaniyanın FTSE 100 indeksi 1,08 faiz, Fransanın CAC 40 indeksi isə 0,78 faiz yüksəlib. İtaliyanın FTSE MIB indeksi 0,72 faiz geriləyib.
Avropada fond indeksləri üzrə fyuçers müqavilələri yeni günə artımla başlayıb.
Texnologiya səhmlərində bərpa meylinin təsiri ilə Asiya birjalarında yeni gündə müsbət dinamika müşahidə olunur.
Cənubi Koreyanın texnologiya şirkətlərindən SK Hynix-in səhmləri 3,8 faiz, Samsung Electronics-in səhmləri 4,6 faiz, Yaponiyanın texnologiya şirkətlərindən Kioxia-nın səhmləri 3,2 faiz, Sony-nin səhmləri isə 2,4 faiz bahalaşıb.
Bu hadisələrin fonunda ticarət sessiyasının başa çatmasına yaxın Cənubi Koreyanın Kospi indeksi 3,9 faiz, Yaponiyanın Nikkei 225 indeksi 2 faiz, Honq Konqun Hang Seng indeksi 1,1 faiz, Çinin Şanxay Kompozit indeksi isə 1 faiz yüksəlib.
