Rubio: ABŞ, Çin və Rusiya arasında üçtərəfli görüş dünya üçün müsbət addım ola bilər
ABŞ, Çin və Rusiya liderlərinin silahlara nəzarət kimi məsələləri müzakirə edəcəyi mümkün üçtərəfli görüş dünya üçün çox müsbət hadisə ola bilər.
AFN.az xəbər verir ki, bunu ABŞ-nin dövlət katibi Marko Rubio Hindistana səfəri zamanı bildirib.
Asiyada təmaslarını davam etdirən Rubio iki günlük rəsmi səfər çərçivəsində Hindistana gəlib.
Rubio ABŞ mərkəzli X sosial şəbəkəsindəki hesabında Mumbay şəhərində Hindistanın xarici işlər naziri Subrahmanyam Caişankarla görüşdüyünü bildirib.
Görüşdə enerji təhlükəsizliyi və müdafiə sahəsində əməkdaşlıq məsələlərini müzakirə etdiklərini qeyd edən Rubio, ABŞ ilə Hindistan arasındakı strateji tərəfdaşlığın inkişaf etdirilməsinin vacibliyini vurğulayıb.
Görüşdən sonra jurnalistlərə açıqlama verən Rubio Hindistanla münasibətlərinin çox yaxın olduğunu və iki ölkə arasında imzalanacaq ticarət sazişinin formalaşdırılması ilə bağlı nikbin olduğunu bildirib.
ABŞ Prezidenti Donald Trampın Çin və Rusiya liderləri ilə üçtərəfli görüş keçirilməsində maraqlı olduğunu deyən Rubio, silahlara nəzarət kimi məsələlərin müzakirə ediləcəyi mümkün görüşün dünya üçün çox müsbət hadisə olacağını söyləyib.
Rubio bildirib ki, dünyanın ən güclü nüvə arsenalına malik ölkələrin liderlərinin ən azı bir-biri ilə əlaqə saxlaması dünyanı daha təhlükəsiz edə bilər.
ABŞ-nin kəşfiyyat məlumatlarını paylaşmaması səbəbindən ukraynalıların öldüyünü Kiyev hökuməti ilə əlaqəli şəxslərdən birinin söylədiyini qeyd edən Rubio bu iddianın qətiyyən doğru olmadığını müdafiə edib.
Rubio Ukraynaya zərər vurmaq məqsədilə qəsdən siyasi göstəriş verilmədiyini vurğulayıb.
Hindistandakı şirkətlərin Venesuelada hasil edilən xam nefti emal etmək imkanına malik olduğunu deyən Rubio sabah bu məsələ ilə bağlı bir şirkətlə görüşəcəyini bildirib.
Rubio X-dəki digər paylaşımında isə Caişankar və Birləşmiş Ərəb Əmirliklərinin xarici işlər naziri Abdullah bin Zayedlə enerji təhlükəsizliyi və iqtisadi məsələlər barədə ayrıca üçtərəfli görüş keçirdiyini qeyd edib.
