Peskov: "Ermənistan KTMT-də iştirakının dayandırılması ilə bağlı heç bir rəsmi addım atmayıb"
Kreml Ermənistanın baş naziri Nikol Paşinyanın müvafiq bəyanatından sonra Ermənistandan ölkənin Kollektiv Təhlükəsizlik Müqaviləsi Təşkilatında (KTMT) iştirakının dayandırılması ilə bağlı müraciət almayıb.
Bu barədə fevralın 23-də Kreml rəsmisi Dmitri Peskov məlumat verib.
“Ermənistan tərəfi bununla bağlı heç bir rəsmi addım atmayıb. Demək istədiyim odur ki, həmkarlarımızla təmasda olub bu açıqlamaların mənasına aydınlıq gətirək. Təfərrüatlar çox vacibdir və ümid edirik ki, erməni dostlarımız hər şeyi izah edəcəklər”, - deyə o, “Zvezda” telekanalına bildirib.
Həmin gün Paşinyan bildirib ki, ölkə KTMT-də iştirakını dondurub. Eyni zamanda, baş nazir Rusiyanın Ermənistandakı hərbi bazasının mümkün bağlanması məsələsinin gündəmdə olmadığını açıqlayıb.
Fevralın 1-də Paşinyan bildirib ki, Ermənistan Rusiya Federasiyası ilə hərbi sahədə münasibətləri davam etdirə bilməz. O qeyd edib ki, Ermənistan kiminlə hərbi-texniki və müdafiə əlaqələrini saxlaya biləcəyinə qərar verməlidir. Onun sözlərinə görə, ilin sonuna kimi dövlətin xarici siyasətinin vektorları müəyyənləşəcək.
Həmin gün Rusiya Xarici İşlər Nazirliyinin KTMT məsələləri üzrə xüsusi tapşırıqlar səfiri Viktor Vasilyev bildirib ki, Ermənistanın təhlükəsizliyi, o cümlədən hərbi-texniki sahədə Təşkilatda əməkdaşlıq olmadan mümkün deyil. O, həmçinin Qərbin Ermənistandan təkcə ölkədə deyil, bütün regionda vəziyyəti gərginləşdirmək üçün istifadə etmək cəhdlərini aşkar olduğunu vurğulayıb.
