KİV: ABŞ İrana nüvə sazişinə qayıtmağa hazır olduğunu bildirib
Vaşinqton Tehranı ABŞ prezidenti Co Bayden administrasiyasının Birgə Hərtərəfli Fəaliyyət Planına (JCPOA) sürətli qayıdış həyata keçirməyə hazır olması barədə məlumatlandırıb.
AFN.az xəbər verir ki, bu barədə İranın Ali Milli Təhlükəsizlik Şurasındakı mənbəyə istinadən “Əl-Cərida” qəzeti məlumat yayıb.
Nəşrin məlumatına görə, iyulun 23-də Amerika tərəfi İran hakimiyyətini məlumatlandırıb ki, Bayden administrasiyası JCPOA-ya “kiçik düzəlişlər edilməklə” tezliklə qayıtmaq üçün danışıqlara hazırdır. İikitərəfli mesaj mübadiləsi Qəzza zolağında Fələstin-İsrail münaqişəsinin kəskinləşməsindən sonra İran və ABŞ arasında birbaşa toqquşmaların qarşısını almaq üçün Tehran və Vaşinqton arasında müntəzəm olaraq həyata keçirilir. Nəşrin həmsöhbətinin sözlərinə görə, Tehran saziş üzrə öhdəliklərini dərhal yerinə yetirməyə başlayarsa, Bayden prezidentlik müddəti bitməmiş sazişi imzalamağa hazırdır.
Öz növbəsində İran gələcək sazişdə ABŞ-ın keçmiş prezidenti Donald Trampın 2018-ci ildə etdiyi kimi, Vaşinqtona sazişdən çıxmağa və Tehrana qarşı sanksiyalar rejimini bərpa etməyə imkan verməyəcək bir sıra məhdudiyyətlərin təsbit edilməsində israrlıdır. Bundan əlavə, İran tərəfi Amerika administrasiyasından gizli obyektlərinin yeri Beynəlxalq Atom Enerjisi Agentliyinə məlum olarsa, onların təhlükəsizliyinə zəmanət tələb edir.
