Rusiya Goethe İnstitutunun filiallarını bağlayacaq
Rusiya Xarici İşlər naziri Sergey Lavrov Almaniyanın qərarlarına cavab olaraq Goethe İnstitutunun Rusiyadakı filiallarını bağlayacaqlarını bildirib.
AFN.az xəbər verir ki, Lavrov Vladivostok şəhərində keçirilən 11-ci Şərq İqtisadi Forumu çərçivəsində tələbələrə mühazirə oxuyub.
Lavrov Avropanın Rusiyanı düşmən hesab etdiyini bildirərək, “Divarlar tikmirik. Özümüzü Avropadan təcrid etmək istəmirik. Avropa özünü bizdən uzaqlaşdırdı. Avropa dürüst şəkildə əməkdaşlıq etməyə hazır deyil. Bunu bacarmır. Avropa heç vaxt öz resursları və öz zəkası ilə yaşamayıb. Həmişə başqalarının hesabına yaşayıb” deyib.
Almaniyada nasizmin yenidən canlanmağa başladığına diqqət çəkən Lavrov Berlinin ölkəsini hərbiləşdirməyə yönəlmiş yanaşma sərgilədiyini və bunun Avropa üçün təhlükəli olduğunu vurğulayıb.
Lavrov, “Qərb razılaşmaq əvəzinə öz şərtlərini diqtə etmək istəyir. Qərb diplomatiyanı sanksiyalar vasitəsilə həyata keçirir. Qərbli həmkarlarımız özlərinə görə yanlış addım atanlara dərhal sanksiya tətbiq edirlər” ifadələrini işlədib.
Kiyev administrasiyasının Rusiya ərazisindəki mülki infrastruktura “terror” hücumları təşkil etdiyini bildirən Lavrov bu əməllərin Qərb tərəfindən təşviq edildiyini deyib.
Lavrov Qərb ölkələrinin Ukrayna böhranına yanaşması ilə bağlı isə, “Onlar sərhədlərimizdə təhlükə yaradaraq məsələni həll etmək əvəzinə dondurmaq istəyirlər. Biz bunu qəbul etsək, nasizmin yenidən canlanmasına imkan vermiş olarıq” deyə danışıb.
Sergey Lavrov məsələnin meydandakı reallıqlar əsasında həll edilməli olduğunu vurğulayıb.
Almaniyanın Leypsiq-Halle hava limanında partlayıcı yüklü PUA aşkarlanması səbəbilə Rusiyaya qarşı müəyyən tədbirlər görmək qərarını dəyərləndirən Lavrov Berlinin bununla bağlı heç bir sübut təqdim etmədiyini bildirib.
Lavrov Rusiyanın buna cavab verəcəyini qeyd edərək, “Goethe İnstitutunun Moskva, Sankt-Peterburq və Yekaterinburq şəhərlərində filialları var. Mədəniyyət mərkəzimiz (Rus Evi) orada bağlandıqdan sonra, əlbəttə ki, bu filiallar da bağlanacaq” deyib.
Avropanın bəzi ölkələrinin Rusiya ilə münasibətləri yaxşılaşdırmağa çalışdığına diqqət çəkən Lavrov Almaniyanın bu istiqamətdəki meylləri baltalamağa çalışdığını bildirib.
Almaniyanın Xarici İşlər naziri Johann Wadephul Rusiyanın Goethe İnstitutunun ölkədəki filiallarını bağlayacaq olmasından təəssüf hissi keçirdiyini deyib.
Wadephul Almaniyanın Veymar şəhərində “Veymar üçbucağı” təşəbbüsü çərçivəsində Polşanın Baş nazir müavini və Xarici İşlər naziri Radoslaw Sikorski və Fransanın Xarici İşlər naziri Jean-Noel Barrot ilə keçirdiyi görüşdən sonra birgə mətbuat konfransı təşkil edib.
Jurnalistin Rusiyanın Goethe İnstitutunun filiallarını bağlayacağı və diplomatik münasibətləri davam etdirmək istədiyi barədə açıqlamasına dair sualını cavablandıran Wadephul, “Rusiyanın bu addımından və Goethe İnstitutunu bağlayacaq olmasından təəssüflənirəm” deyib.
Wadephul Goethe İnstitutunun Rusiyada mədəniyyət körpüsü kimi mühüm funksiyaya malik olduğunu bildirərək, “Biz bunu davam etdirməyə hazır idik. Məncə, bunu davam etdirmək düzgün olardı, çünki Rusiya ilə Almaniyadakı insanlar arasında əsasən həmişə yaxşı və dost münasibətlər olub. Əsas problem hazırkı vəziyyətdə Rusiyadakı hakimiyyətdir” deyə bildirib.
Almaniyanın iki ölkə arasındakı münasibətlər məsələsində hər zaman realist mövqe sərgilədiyini qeyd edən Wadephul, “Burada olan dostlarımızla birlikdə Rusiya ilə məntiqli dialoq aparmağa hər zaman hazırıq. Lakin bunun ilkin şərti Rusiyanın Ukraynaya qarşı apardığı təcavüzkar müharibəni dayandırması və hər şeydən əvvəl bizə və müttəfiqlərimizə qarşı hər cür hücuma son qoymasıdır” deyə qiymətləndirib.
Almaniyadakı Leypsiq-Halle hava limanında avqustun 4-də Ukraynaya məxsus yük təyyarəsinin yaxınlığında içərisində partlayıcı qurğu olduğu ehtimal edilən PUA aşkarlanmışdı.
ABŞ kəşfiyyatı aşkarlanan partlayıcı yüklü PUA-nın xüsusiyyətlərinin Rusiya hərbi kəşfiyyatına “xas” olduğunu iddia etmişdi.
Almaniya bu hadisəyə görə Rusiyanı günahlandıraraq Bonndakı Rusiya Baş Konsulluğunun sentyabrın 18-dən etibarən bağlanması və Berlindəki Rus Evi ilə bağlı müqaviləyə xitam verilməsi kimi tədbirlər gördüyünü açıqlamışdı.
Rusiya Xarici İşlər naziri Sergey Lavrov Almaniyanın qərarlarına cavab olaraq Goethe İnstitutunun Rusiyadakı filiallarını bağlayacaqlarını bildirib.
