Danimarka kəşfiyyatı: Rusiya yaxın vaxtlarda NATO ölkəsinə hücum edə bilər
Danimarka kəşfiyyatı Rusiyanın qarşıdakı aylarda NATO ölkələrindən birinə məhdud hərbi hücum edə biləcəyini açıqlayıb.
AFN.az xəbər verir ki, Danimarka Müdafiə Kəşfiyyat Xidmətinin cümə axşamı yayımladığı hesabatda Rusiyanın Ukraynaya dəstək verən NATO infrastrukturuna uzaqmənzilli zərbələr endirə biləcəyi barədə xəbərdarlıq edilib.
Hesabatda həmçinin Rusiyanın qonşu ölkələrdən birinə azsaylı hərbçilərlə, rütbə nişanları olmadan məhdud quru əməliyyatı keçirə biləcəyi bildirilib. Bu ssenari üzrə riskin aşağı, lakin artmaqda olduğu qeyd edilib.
Hesabat Polşanın mərkəzi hissəsində yerləşən Starlink peyk stansiyasında baş verən yanğından bir neçə saat sonra yayımlanıb. Yerli hakimiyyət orqanları hadisəni sabotaj aktı kimi qiymətləndirib.
Polşanın baş nazir müavini Kşiştof Qavkovski Mazovya bölgəsində gecə saatlarında baş verən yanğının stansiyanı sıradan çıxarmaq məqsədilə qəsdən törədildiyini bildirib.
Qavkovski hadisənin Ukrayna ordusu da daxil olmaqla bir sıra qurumların internetə çıxışını kəsdiyini deyib. O, yanğının məsulunun hələ müəyyənləşdirilmədiyini, lakin bir sıra əlamətlərin hadisənin Rusiyanın yeni hücum doktrinası ilə əlaqəli ola biləcəyini göstərdiyini bildirib.
Qavkovski bütün sistemlərin hazırda işlədiyini, lakin hadisənin hibrid müharibənin elementlərindən biri kimi qəbul edilməli olduğunu qeyd edib.
Starlink Ukraynanın hərbi rabitəsinin mühüm hissəsinə çevrilib. Hadisə Avropada Ukraynanı dəstəkləyən infrastruktura qarşı Rusiyanın ehtimal edilən sabotaj əməliyyatlarının artdığı bir vaxtda baş verib.
Almaniya da bu ayın əvvəlində Leypsiq/Halle hava limanına pilotsuz uçuş aparatı ilə edilən hücum cəhdinə görə Rusiyanı açıq şəkildə ittiham edib. Pilotsuz uçuş aparatı zavodlarında baş verən yanğınlar və dəmir yolu infrastrukturuna qarşı sabotajlar da Moskva ilə mümkün əlaqələri baxımından araşdırılır. Rusiya isə bu cür hücumlarda iştirak etdiyi barədə ittihamları rədd edir.
Son həftələrdə bir sıra Avropa kəşfiyyat rəhbərləri Rusiyanın NATO ölkələrinin Ukraynaya dəstək iradəsini sınağa çəkəcək addımlar ata biləcəyi barədə xəbərdarlıq ediblər. Bununla belə, belə bir addımın nə vaxt baş verə biləcəyi ilə bağlı fərqli qiymətləndirmələr mövcuddur.
Danimarkalı rəsmilər Rusiyanın qarşıdakı aylarda Avropa ölkələrinə qarşı hibrid hücumlarını artırmasının gözlənildiyini və bunun hədəf ölkələr üçün daha ağır nəticələr yarada biləcəyini bildiriblər.
Bu hücumların cəmiyyətin fəaliyyətini iflic edə biləcək dağıdıcı kiberhücumlarla yanaşı, yüksək insan itkisi riski yaradan sabotaj əməllərini də əhatə edə biləcəyi qeyd olunub.
Rusiya strategiyalarına bələd olan anonim mənbə də Moskvanın hibrid hücumlarını artırmasının mümkün olduğunu bildirib. Mənbənin sözlərinə görə, Rusiya ordusunun yüksək komandanlığı bəzi NATO ölkələrinin Ukraynaya yalnız silah və kəşfiyyat məlumatları verməklə kifayətlənmədiyini, raketlərin yönləndirilməsinə də kömək etdiyini düşünür.
Həmin mənbə Rusiyanın NATO-nun özünə qarşı artıq hibrid müharibə apardığını və buna eyni şəkildə cavab vermək hüququna malik olduğunu düşündüyünü deyib.
Hibrid hücumlar kiberhücum, sabotaj və dezinformasiya kimi qarşı tərəfə təzyiq göstərmək və ya onu sabitsizləşdirmək məqsədi daşıyan hərbi olmayan taktikalara verilən ümumi addır.
Hesabatda Rusiyanın məqsədinin Avropanın resurslarını Ukraynaya dəstəkdən yayındırmaq və NATO daxilində vahid cavab üzərində razılıq əldə edilmədiyi halda ittifaqdakı parçalanmanı dərinləşdirmək ola biləcəyi bildirilib.
Danimarka kəşfiyyatı Rusiyanın NATO ölkələrindən birini birbaşa işğal etməsini olduqca aşağı ehtimal hesab edir, lakin bu ssenarinin tamamilə istisna edilə bilməyəcəyini vurğulayır.
Kəşfiyyat xidməti Rusiyanın NATO-nun kollektiv müdafiəni nəzərdə tutan 5-ci maddəsini sınağa çəkməyə çalışa biləcəyini bildirib.
Hesabatda Moskvanın ABŞ-ın mümkün müharibə zamanı Avropadakı müttəfiqlərinə dəstək verməyəcəyinə inanması halında NATO ölkələrinin vahid cavab verməyəcəyini düşünə biləcəyi barədə xəbərdarlıq edilib.
NATO üzvləri arasında ABŞ-ın mümkün Rusiya hücumu zamanı Donald Tramp administrasiyasının Avropanın müdafiəsinə gəlib-gəlməyəcəyi ilə bağlı narahatlıqların davam etdiyi qeyd olunub.
Avropadakı birliklə bağlı suallar da artır. Kremlin yaxın əlaqələr saxlayan Slovakiyanın Baş naziri Robert Fitso ölkəsinin 5-ci maddə ilə bağlı müəyyən öhdəliklər səbəbindən hərbi münaqişəyə cəlb edilməsini istəmədiyini bildirib.
Ukrayna Prezidenti Volodimir Zelenski də BMT Baş Assambleyasındakı çıxışında Rusiyanın Ukraynadan kənarda digər ölkələri təhdid etməyə davam etdiyini bildirib.
Zelenski Moskvanın Moldova, Polşa və Baltikyanı ölkələrlə yanaşı, Cənubi Qafqaz və Mərkəzi Asiya ölkələrinin suverenliyinə də hörmət etmədiyini deyib.
