ABŞ, Yaponiya və Avstraliya Cənubi Çin dənizində birgə hərbi dəniz təlimləri keçirməyi planlaşdırır
ABŞ, Yaponiya və Avstraliya bu həftə Filippinin qərb sahili yaxınlığında Cənubi Çin dənizində Çinin mübahisəli sularda təcavüzünün son nümayişindən sonra regionda qanunun aliliyinə sadiqliklərini vurğulamaq üçün birgə hərbi dəniz təlimləri keçirməyi planlaşdırır.
AFN.az xəbər verir ki, bu barədə "Associated Press" Filippin təhlükəsizlik qüvvələri rəsmilərinə istinadən məlumat yayıb.
Təlimdə "güc nümayiş etdirmək və birgə təlimlər keçirmək üçün" birlikdə üzən üç təyyarə daşıyan kreyser iştirak edəcək. Filippin təhlükəsizlik rəsmisi "Associated Press"ə bildirib ki, onların komandirləri dəniz təlimindən sonra Manilada filippinli həmkarları ilə görüşmək niyyətindədirlər.
"ABŞ təyyarədaşıyan "USS America"nı yerləşdirməyi planlaşdırır, Yaponiya isə ən böyük döyüş gəmilərindən biri olan "JS Izumo" helikopter gəmisini göndərəcək. Kral Avstraliya Donanması helikopterləri də daşıyan "HMAS Canberra" gəmisini göndərəcək" - deyə filippinli rəsmi bildirib. O, həmçinin qeyd edib ki, birgə təlim aylar əvvəl planlaşdırılıb.
Mənbə əlavə edib ki, Filippin hərbi logistik məhdudiyyətlərə görə bu həftə təlimdə iştirak etməyəcək, lakin gələcəkdə iştirakçı olmağa açıqdır.
Avqustun 5-də Çin Sahil Mühafizəsinin gəmiləri uzun müddətdir potensial qaynar nöqtə və regionda ABŞ-Çin gərginliyinin səbəblərindən biri kimi görünən mübahisəli su yolunda Filippin gəmiçiliyinə su şırnaqlarından atəş açıb.
