Banqladeşdə danq qızdırmasından ölənlərin sayı 200-ü ötüb
İlin əvvəlindən Banqladeşdə danq epidemiyasından ölənlərin sayı 201 nəfərə çatıb.
Sinxua agentliyinin məlumatına görə, ölkədə yanvar ayından bəri 37,688 yoluxma halı qeydə alınıb, 29,560 nəfər sağalıb. Yerli səhiyyə mütəxəssisləri hökumətin rəsmi olaraq bunu təsdiqləməməsinə baxmayaraq, qızdırmanın artıq epidemiya səviyyəsinə çatdığını deyirlər. Mütəxəssislər xəbərdarlıq edirlər ki, insidentlə bağlı vəziyyət daha da pisləşə bilər.
Banqladeşdə davam edən musson yağışları infeksiyanın yayılmasına kömək edir. Respublikanın səlahiyyətli orqanları ağcaqanadların çoxalmasına nəzarət tədbirlərini gücləndirib, onların sürfələrinə qarşı mübarizəni artırıblar.
2022-ci ildə Banqladeşdə danq xəstəliyindən 281 nəfər ölüb. Ümumilikdə 62 423 sakin virusa yoluxub.
Tropik və subtropik iqlimi olan ölkələrdə danq qızdırması üstünlük təşkil edir. Virusun daşıyıcıları dişi ağcaqanadlardır.
