İran Suriyanın hava hücumundan müdafiəsinə sadiq olduğunu bəyan edib
İran müdafiə nazirinin beynəlxalq məsələlər üzrə müavini general Həmzə Qələndəri Tehranın Suriyaya hava hücumundan müdafiə yardımı göstərmək öhdəliyi haqda danışıb.
AFN.az xəbər verir ki, bu barədə "Tasnim" məlumat yayıb. Qələndəri bildirib ki, Suriyanın İsrailin hava hücumlarını dəf etmək qabiliyyətini təkmilləşdirməsi təqdirəlayiqdir. "Keçmişdə Suriya İsrailin hava hücumları qarşısında müdafiəsiz idi. Bununla belə, Suriya ordusu hazırda çoxlu sayda hava zərbələrini dəf edir" - deyə o, vurğulayıb.
Həmzə Qələndəri əlavə edib ki, İran Suriya kimi dost ölkələrə hava hücumundan müdafiəni gücləndirməyə və hava hədəflərinə qarşı kömək etməyə borcludur.
2020-ci ildə BMT-nin silah embarqosunun ləğvindən sonra İranın hərbi və müdafiə məhsullarının alınmasına marağın artdığını vurğulayan nazir müavini deyib ki, İslam Respublikasının humanitar qayğıları silah ixracına təkan verib. Həmzə Qələndəri İranın digər ölkələrə müdafiə texnologiyaları ixrac etmək planlarına işarə edərək əlavə edib: "Biz bir çox qonşularımız və dost dövlətlərimizə təkcə avadanlıq və silahlar baxımından deyil, həm də müdafiə silahlarının istehsalı texnologiyaları sahəsində kömək etmişik".
2020-ci ilin iyulunda İran və Suriya hərbi və müdafiə sektorlarında əməkdaşlığı genişləndirmək üçün hərtərəfli saziş imzalayıblar. İran 2011-ci ildən etibarən Suriyaya məsləhət xarakterli hərbi yardım edir.
