Aİ Belarusu Rusiya nüvə silahlarından imtina etməyə çağırıb
Belarus respublika ərazisində Rusiya nüvə silahlarının yerləşdirilməsi planlarından imtina etməlidir.
Bu barədə Avropa İttifaqının (Aİ) nümayəndəsi Lente.ru-ya şərhində bildirib.
Rəsmi xatırladıb ki, Aİ-nin xarici işlər və təhlükəsizlik siyasəti üzrə ali nümayəndəsi Josep Borrell əvvəllər Moskva və Minskin Belarus ərazisində Rusiya nüvə başlıqlarının yerləşdirilməsi qərarını pisləyib.
Avropa İttifaqı Belarusu Rusiyanın aqressiv müharibəsini dəstəkləməyi dayandırmağa, nüvə silahlarının yerləşdirilməsindən imtina etməyə və qızışdırıcı bəyanatlardan çəkinməyə çağırıb.
Bundan əvvəl Belarus prezidenti Aleksandr Lukaşenko bildirib ki, Minsk Belarusa hücum olacağı təqdirdə nüvə silahından istifadə alqoritmi hazırlayacaq. Prezident müvafiq tapşırığı Belarus Baş Qərargah rəisi Viktor Quleviçə, müdafiə naziri Viktor Xreninə və Dövlət Təhlükəsizlik Komitəsinin sədri İvan Tertelə həvalə edib. O, həmçinin bildirib ki, nüvə silahının böyük hissəsi artıq respublikaya çatdırılıb.
