Trampın məhkəməsi gələn il mayın 20-də başlayacaq
ABŞ-ın keçmiş prezidenti Donald Trampın məxfi sənədlərlə yolverilməz davranması işi üzrə məhkəmə prosesi gələn il mayın 20-də başlayacaq.
Cümə günü Florida ştatının Fort Pirs şəhərində dairə hakimi Eileen Cannon iyulun 21-də qərar çıxarıb. Trampın vəkilləri bu tarixə etiraz edərək, müvəkkillərinin işi ilə bağlı istənilən məhkəmə prosesinin yalnız 2024-cü ilin noyabrında ABŞ-da keçiriləcək prezident seçkilərindən sonra keçirilməli olduğunu vurğulayıblar.
DW yazır ki, Trampın sözçüsü deyib ki, məhkəmə təqvimi prezident Trampa və onun hüquq komandasına cinayət işinə qarşı mübarizəni davam etdirməyə imkan verir. ABŞ-ın xüsusi prokuroru Cek Smitin ofisinin sözçüsü şərh verməkdən imtina edib.
İyunun 8-də Trampa qarşı vəzifədən gedərkən milli təhlükəsizlik sənədlərini qanunsuz saxlamaqda səkkiz maddə üzrə ittiham irəli sürülüb. İttiham tərəfi hesab edir ki, Tramp ondan sənədləri ələ keçirməyə çalışan məmurlara yalan danışaraq, materialları şəxsən qaytarmaq niyyətində olduğunu iddia edib. Tramp iddiaları qəbul etməyib.
Gələn il martın 25-də Donald Tramp Manhettendə Trampın məşuqəsi olduğunu iddia edən porno ulduza susqunluq pulu ödənilməsini ört-basdır etmək üçün biznes sənədlərinin saxtalaşdırılması ilə bağlı bir neçə fakt üzrə məhkəmə qarşısına çıxmalıdır.
