Pezeşkian: ABŞ danışıqlara yox, İranı tabe etməyə çalışır
İran prezidenti Məsud Pezeşkian amerikalı həmkarı Donald Trampın “İranı diz çökdürmək üçün zalım şərtlər irəli sürdüyünü” deyib.
AFN.az xəbər verir ki, məlumatı "Tasnim" yayıb. Pezeşkian bildirib ki, Tramp dialoq istəyində səmimi olsaydı, “xalqa qarşı” sanksiyalar tətbiq etməzdi.
İranın cənubundakı Buşəhr liman şəhərinə səfəri zamanı Pezeşkian ABŞ prezidentinin İrana qarşı təhdidlərini pisləyib.
O deyib ki, İran danışıqları və ya dialoqu istisna etmir, lakin ABŞ prezidenti Donald Tramp dialoqu dəstəklədiyini bəyan etməmişdən əvvəl İrana qarşı şərtlər və sanksiyalar tətbiq etməyə çalışsa, danışıqlar mənasız olacaq.
Pezeşkianın sözlərinə görə, ABŞ administrasiyası danışıqlara deyil, İranı tabe etməyə çalışır və bu heç vaxt baş verməyəcək. O vurğulayıb ki, düşmənlər İranın tərəqqisinə mane ola bilməyəcəklər: "ABŞ sanksiyaları İranı iflic edə bilməz, baxmayaraq ki, İslam Respublikası sanksiyalara məruz qalmaq niyyətində deyil".
O, İranın bütün ölkələrlə sülh və dostluğun tərəfdarı olduğunu və qonşuları ilə isti münasibətlər saxlamağa çalışdığını vurğulayıb.
