Microsoft rəhbəri süni intellektə qlobal təhlükəsizlik qaydalarının tətbiqini istəyir
Microsoft-un rəhbəri Bred Smit hazırda südün və paltaryuyan maşınların süni intellektdən daha ciddi nəzarətə məruz qaldığını bildirib.
AFN.az xəbər verir ki, o, süni intellekt texnologiyalarının təhlükəsizliyini təmin etmək üçün qlobal qaydaların qəbul edilməsinə çağırıb.
Smitin sözlərinə görə, süni intellekt agentinin nəzarətdən çıxaraq hər hansı sistemə müdaxilə etməsi halında zərərçəkənlərə məlumat verilməsi qanunla məcburi olmalı, süni intellekt məhsulları isə bazara çıxarılmadan əvvəl müstəqil qiymətləndiricilər tərəfindən təsdiqlənməlidir.
Bu fikirlər ABŞ Prezidenti Donald Trampın mövqeyi ilə ziddiyyət təşkil edir. Tramp ABŞ şirkətlərinin Çin rəqiblərindən geri qalmaması üçün texnologiya sektorunun özünənəzarət mexanizmlərinə üstünlük verməli olduğunu müdafiə edir.
Smit isə hazırda paltaryuyan maşınların süni intellektdən daha çox təhlükəsizlik qaydalarına tabe olduğunu, supermarketlərdə satılan hər bir süd qabının da təhlükəsizlik standartları və yoxlamalarla əhatə edildiyini vurğulayıb.
Sektor mütəxəssislərinin bu texnologiyanın bəşəriyyət üçün təhlükə yarada biləcəyini bildirməsindən sonra süni intellektə nəzarət edəcək qanun və qaydaların qəbuluna dair çağırışlar artıb. “Anthropic”, “OpenAI” və “Google DeepMind” kimi ABŞ şirkətlərinin rəhbərləri süni intellektin inkişafının yavaşladılması ideyasını dəstəkləsələr də, Donald Tramp buna qarşı çıxıb.
Televiziya proqramında çıxış edən Smit süni intellekti təcili nəzarət tələb edən həm alət, həm də silah kimi xarakterizə edib və bu prosesə dərhal başlanmasının vacibliyini bildirib.
O, şirkətlərin süni intellektin nəzarətdən çıxması ehtimalına qarşı sistemi dayandırmaq və ya fəaliyyətini yavaşlatmaq üçün təcili müdaxilə mexanizmlərinə ehtiyac duyduğunu deyib.
Smit, həmçinin şirkətlərin insidentlər barədə hesabat hazırlamasını və texnologiyanın nəzarətdən çıxması halında zərərçəkənləri məlumatlandırmasını məcburi edən qanunvericiliyin qəbulunu müdafiə edib. Onun fikrincə, yeni süni intellekt texnologiyaları müstəqil dövlət qiymətləndiriciləri tərəfindən yoxlanılmalıdır.
Smit bildirib ki, digər məhsullar üçün belə nəzarət mexanizmlərinin necə tətbiq olunması artıq məlumdur. İndi həmin təcrübədən istifadə etmək və onu süni intellektə necə uyğunlaşdırmağın yollarını müəyyənləşdirmək lazımdır.
O, sabiq Baş nazir Rişi Sunakın dövründə yaradılmış Süni İntellekt Təhlükəsizliyi İnstitutunun sayəsində Britaniyanın bu qlobal qaydaların hazırlanmasına rəhbərlik etmək üçün ən əlverişli mövqedə olduğunu bildirib. Smit texnologiya sektorunda çalışanların əksəriyyətinin müvafiq texniki imkanlara malik aparıcı ölkənin Britaniya olduğunu qəbul etdiyini vurğulayıb.
Smitin mövqeyi süni intellekt sahəsində ABŞ-nin sürətlə irəliləməli olduğunu düşünən Donald Trampın yanaşmasından xeyli fərqlənir. ABŞ Prezidenti dəfələrlə süni intellekt yarışında qalib gələn tərəfin üstünlük qazanacağını bildirib.
Bununla belə, Smit ABŞ hökumətinin Britaniyanın rəhbərlik etdiyi süni intellekt tənzimləmələrinə Trampın açıqlamalarından göründüyü qədər qarşı çıxacağına inanmır.
Onun fikrincə, ABŞ Britaniyanın standartlar müəyyənləşdirməsini Avropa İttifaqının bu sahədəki rolundan daha rahat qəbul edə bilər. Smit Vaşinqtonda insanların Britaniyaya və Londona Brüsselə yanaşdıqları kimi baxmadıqlarını deyərək bunu üstünlük kimi qiymətləndirib.
İnsan nəzarətindən çıxan süni intellekt agentlərinə və qlobal kibertəhlükəsizliyi riskə atan güclü modellərə diqqət çəkən Smit artıq hərəkətə keçməyin vaxtı çatdığını bildirib.
O, insanları sakit, lakin qətiyyətli şəkildə bir araya gətirməyə başlamağın vacibliyini vurğulayıb və bunun həm Microsoft-un, həm də ölkə olaraq Britaniyanın roluna çevrilməsinə ümid etdiyini deyib.
Ötən ayın sonunda Donald Tramp “OpenAI”, “Anthropic”, “Nvidia”, “SpaceX”, “Meta” və “Google” şirkətlərinin rəhbərlərini Ağ Evdə qəbul edib. Görüş zamanı rəhbərlər mənəvi öhdəlik xarakteri daşıyan sənəd imzalayıblar. Şirkətlər süni intellekt sistemlərinin nəzərdə tutulduğu kimi işləyib-işləmədiyini qiymətləndirmək, texniki sistemlərin sındırılmasının və ya onlara arzuolunmaz üsullarla girişin qarşısını almaq üçün müstəqil yoxlayıcılarla əməkdaşlıq etməyə razılaşıblar.
Smit bu açıqlamanı müsbət qiymətləndirdiyini və Microsoft-un sənədi imzalamaqdan məmnun olduğunu bildirib.
O, bunu yaxşı və zəruri addım adlandırsa da, artıq bunun kifayət etdiyini düşünmədiyini deyib. Smitin sözlərinə görə, özünütənzimləmə sistemlərinin əsas çətinliyi məsuliyyətli şirkətlərin tələb olunanları yerinə yetirməsi, lakin məsuliyyətsiz şirkətlərin eyni qaydalara əməl etməməsi ehtimalıdır.
Smit əlavə edib ki, əsas narahatlıq doğuran məhz məsuliyyət hissi daşımayan şirkətlərdir.
