Pakistan Səudiyyə Ərəbistanına hər cür müdafiə dəstəyi verəcəyini bildirib
Pakistan ordusu Yəməndə husilərin hücumları qarşısında Səudiyyə Ərəbistanının müdafiəsi üçün lazım olan bütün dəstəyi göstərdiyini və bunu davam etdirəcəyini açıqlayıb.
“Dawn” qəzetinin məlumatına görə, Pakistan Ordusunun İctimaiyyətlə Əlaqələr İdarəsinin (ISPR) baş direktoru, general-leytenant Əhməd Şərif Çaudri “Independent Arabia” platformasına müsahibə verib.
Çaudri Səudiyyə Ərəbistanının suverenliyinin, ərazi bütövlüyünün və təhlükəsizliyinin Pakistan üçün ən yüksək əhəmiyyət daşıdığını bildirib. O, müqəddəs məkanların təhlükəsizliyi məsələsində heç bir istisnaya yol verilə bilməyəcəyini vurğulayıb.
Çaudri bu məsələnin müzakirəyə açıq olmadığını və Pakistan üçün qəti mövqe təşkil etdiyini deyib. O, husilərin hücumlarına qarşı bu məqsədlə lazım olan bütün dəstəyin göstərildiyini və göstərilməyə davam edəcəyini bildirib.
Husilərin hücumları davam edərsə, Pakistanın dəstəyinin yalnız müdafiə məqsədi daşıyıb-daşımayacağı ilə bağlı suala cavab verən Çaudri ittifaqın heç bir təcavüzkar niyyətinin olmadığını və tamamilə müdafiəyə yönəldiyini vurğulayıb.
