Pakistan Məkkə Ortaq Müdafiə Sazişinə sadiqliyini bir daha təsdiqləyib
Pakistanın xarici işlər naziri Məhəmməd İshaq Dar Səudiyyə Ərəbistanının paytaxtı Ər-Riyaddakı Kral Xalid Beynəlxalq Hava Limanına edilən hücum zamanı 6 Pakistan vətəndaşının yaralandığını bildirib.
AFN.az xəbər verir ki, nazir ölkəsinin Məkkə Ortaq Müdafiə Sazişinə sadiqliyini bir daha təsdiqləyib.
Dar ABŞ mərkəzli X şirkətinin sosial media platformasındakı paylaşımında Ər-Riyaddakı hava limanına qarşı hücumu ən sərt ifadələrlə pislədiklərini qeyd edib.
Hücum zamanı yaralanan 6 Pakistan vətəndaşı da daxil olmaqla, bütün yaralılara tezliklə şəfa arzulayan Dar mülki şəxsləri və mülki infrastrukturu hədəf alan hücumların qəbuledilməz olduğunu, beynəlxalq hüququ pozduğunu və regional sülh və təhlükəsizlik üçün ciddi təhdid yaratdığını bildirib.
Pakistanın Səudiyyə Ərəbistanı rəhbərliyi və xalqı ilə həmrəylik nümayiş etdirdiyini vurğulayan Dar ölkəsinin Məkkə Ortaq Müdafiə Sazişi çərçivəsində Səudiyyə Ərəbistanının suverenliyinə, ərazi bütövlüyünə və təhlükəsizliyinə bağlılığını davam etdirəcəyini qeyd edib.
Pakistanın Baş naziri Şahbaz Şərif də hücumu kəskin şəkildə pisləyərək həyatını itirənlərin ailələrinə başsağlığı verib və yaralılara tezliklə şəfa arzulayıb.
Səudiyyə Ərəbistanının Mülki Aviasiya Baş İdarəsi (GACA) oktyabrın 10-da Kral Xalid Beynəlxalq Hava Limanını hədəf alan hücum nəticəsində 13 nəfərin öldüyünü, 309 nəfərin yaralandığını bildirmişdi.
Yəməndə hökumət qüvvələri ilə husilər arasında toqquşmalar son dövrlərdə artarkən, İranın dəstəklədiyi husilər onlara hücum edildiyini iddia edərək Səudiyyə Ərəbistanını ballistik raketlər və pilotsuz uçuş aparatları ilə hədəf alırlar.
