Maduro və həyat yoldaşına işgəncə ilə bağlı yeni ittiham irəli sürülüb
ABŞ-ın Nyu-York Cənub Dairəsi üzrə federal məhkəməsinin böyük jüri heyəti Venesuela Prezidenti Nikolas Maduro və həyat yoldaşı Siliya Floresə qarşı yenilənmiş ittihamnaməni təsdiqləyib.
AFN.az xəbər verir ki, sənədə əsasən, Maduro və Flores işgəncə törətmək məqsədilə sövdələşmədə ittiham olunurlar.
İttihamnamədə onların başqa şəxslərə fiziki və mənəvi əzab verməyə yönəlmiş hərəkətlər barədə bilərəkdən razılığa gəldikləri iddia olunur. Prokurorluğun mövqeyinə görə, bu fəaliyyətin məqsədlərindən biri siyasi müxalifətin və fərqli fikirlərin sıxışdırılması, həmçinin hakimiyyətin və səlahiyyətlərin qorunması olub.
Maduro və Floresə işgəncə məqsədli sövdələşmə ilə yanaşı, daha dörd maddə üzrə də ittiham irəli sürülüb. Bunlar avtomatik silahlara və dağıdıcı qurğulara sahib olmaqla bağlı iki ittiham, narkotik qaçaqmalçılığı və narkoterrorizm məqsədilə sövdələşmədir.
