Avstraliyadan müdafiə xərcləri üçün 50 milyard dollar əlavə büdcə
Avstraliyanın müdafiə naziri Riçard Marles qarşıdakı 10 ildə müdafiə xərcləri üçün 50 milyard dollarlıq əlavə büdcə ayrılacağını açıqlayıb.
ABC News-un məlumatına görə, Avstraliya Milli Mətbuat Klubunda çıxış edən Marles “İnteqrasiya edilmiş İnvestisiya Proqramı” (IIP) və ölkənin müdafiə büdcəsinin artırılması planını ehtiva edən 2024-cü il Milli Müdafiə Strategiyasını təqdim edib.
Marles, 10 illik müddətdə Avstraliyanın müdafiə büdcəsinə 50 milyard dollar əlavə ediləcəyini, 72,8 milyard dolların isə mövcud xərclərin yenidən təşkili ilə müdafiə xərclərində istifadə edilə biləcəyini ifadə edib.
Nazir Marles qeyd edib ki, hökumətin yeni planı çərçivəsində uzaqmənzilli raketlərin, hədəf nişanlı və avtonom silah sistemlərinin hazırlanmasına 1 milyard dollardan çox vəsait ayrılacaq.
Marles hökumətin ölkənin müdafiəsi üçün Asiya Sakit Okean bölgəsinə diqqət ayırması və ölkə sərhədlərini qorumaqla məhdudlaşmaması lazım olduğunu vurğulayıb.
Avstraliyanın ticarətə asılı olduğunu və yanacaq ehtiyacının təxminən 85 faizini Cənubi Koreya, Sinqapur və Malayziyadan idxal etdiyini xatırladan Marles, "Biz həqiqətən dənizdəki rabitə şəbəkəsindən asılıyıq. Dəniz yolundakı qaydalar bizim hər şeyimizdir" deyib.
Müdafiə sahəsində təxminən 4400 işçiyə ehtiyac olduğunu ifadə edən Marles, Avstraliyadan olmayan bəzi vətəndaşların immiqrasiya proqramı ilə orduya qatıla biləcəyinə diqqət çəkib.
Elan edilən yeni proqramın Avstraliyanın müdafiə sahəsindəki prioritetlərinə diqqət yetirəcəyini, Avstraliyanı və maraqlarını təhdidlərə qarşı qorumağı hədəflədiyinə diqqət çəkən Marles, hökumətin müdafiə sahəsinə tarixi sərmayə etdiyini söyləyib.
Proqramda sualtı gəmilərin inkişafı, kosmos və kiber sahələrə digər böyük investisiyalar üçün təxminən 76 milyard dollar xərclənəcəyi açıqlanıb.
Avstraliyanın müdafiə büdcəsindəki bu artımla müdafiə xərclərinin 2033-2034-cü illərdə ölkənin ümumi daxili məhsulunun təxminən 2,4 faizini təşkil edəcəyi bildirilir.
Bundan əlavə, Avstraliya fevralın 20-də donanmasını ikiqat artırmaq və modernləşdirmək üçün 7 milyard dollarlıq büdcə ayıracağını açıqlayıb.
