Baş həkim: “Hamilələrin qadın məsləhətxanalarına cəlb edilməsində çətinliklər var”
AFN.az APA-ya istinadən verdiyi xəbərə görə, qadın məsləhətxanasının baş həkimi Aygün Budaqova bildirib ki, bütün qadın məsləhətxanalarında hamilələrin vaxtında aşkar olunması, körpələrin sağlam dünyaya gəlməsi üçün böyük işlər görülür.
“Hamilələr qadın məsləhətxanalarında Səhiyyə Nazirliyi tərəfindən təsdiq olunmuş antenatal xidmət üzrə protokol əsasında müayinə və müalicə olunurlar. Bu məqsədlə qadın məsləhətxanalarında zəruri şərait yaradılıb və hamiləliyin hər bir dövrünə ciddi şəkildə nəzarət olunur. Hər hansı bir genital, ekstragenital, patoloji hal baş verərsə, dərhal mütəxəssislər tərəfindən nəzarətə götürülür və lazım gəldikdə, hospitalizasiya həyata keçirilir”.
Baş həkim əlavə edib ki, bəzi hallarda hamilələri qadın məsləhətxanalarına cəlb etməkdə müəyyən çətinliklər var: “Hamilələr qadın məsləhətxanasında olarkən onların özləri, bətnində inkişaf edən körpələri tam müayinə olunur, onların inkişafına nəzarət olunur. Buna görə də hamilələrin qadın məsləhətxanasına gəlməsi çox vacibdir”.
A. Budaqova qeyd edib ki, hamilələrə hamiləlik dövründə gedən prosesləri və digər məlumatları qeyd etmək məqsədi ilə müvafiq qeydiyyat kartları təqdim edilir: “Bundan başqa, hamilələrin məlumatlandırılması məqsədi ilə qadın məsləhətxanalarında analıq məktəbləri təşkil olunur. Analıq məktəblərində hamiləliyin hər 3 trimestrinə aid müxtəlif mövzularda mühazirələr oxunur”.
