Macarıstan Beynəlxalq Cinayət Məhkəməsindən çıxacağını açıqlayıb
Macarıstan hökuməti Beynəlxalq Cinayət Məhkəməsindən (ICC) çıxmaq qərarına gəldiyini açıqlayıb.
Bu barədə Macarıstan hökumətinin sözçüsü Zoltan Kovacs sosial media hesabından açıqlama verib.
Macarıstanın konstitusiya və beynəlxalq hüquqi öhdəliklərinə uyğun olaraq, geri çəkilmə prosesi cümə axşamı başlayacaq.
Qeyd edək ki, bu qərar ICC tərəfindən həbsinə order verilmiş İsrailin baş naziri Benyamin Netanyahunun Macarıstana səfəri zamanı qəbul edilib.
Macarıstan 15 yanvar 1999-cu ildə Roma Nizamnaməsini imzalayıb və ratifikasiya sənədini 30 noyabr 2001-ci ildə arxivə təhvil verib. BCM-i yaradan Roma Nizamnaməsi 1 iyul 2002-ci ildə qüvvəyə minib.
Roma Nizamnaməsinin 127-ci maddəsinə əsasən, geri çəkilmə Birləşmiş Millətlər Təşkilatının (BMT) Baş katibinə yazılı bildiriş göndərməklə həyata keçirilir. Əgər bildirişdə tarix göstərilməyibsə, geri götürmə bildirişin alınmasından bir il sonra qüvvəyə minir.
Müvafiq olaraq, bu bir illik müddət ərzində Macarıstan Roma Nizamnaməsinə əsasən BCM qarşısında öhdəliklərini yerinə yetirməyə davam etməlidir, yəni lazım gəldikdə həbs qərarlarını icra etməlidir.
