Qalibaf: ABŞ-ın Hörmüz boğazına hər hansı bir müdaxiləsinə icazə verməyəcəyik
İran Məclis və Müzakirə Heyətinin sədri Məhəmməd Baqir Qalibaf Hörmüz boğazının idarə olunması məsələsində qətiyyətli olduqlarını və ABŞ-ın müdaxiləsinə icazə verməyəcəklərini bildirib.
AFN.az xəbər verir ki, Məclis sədrinin rəsmi Teleqram hesabının məlumatına görə, Qalibaf İranın keçmiş lideri Əli Xamenei üçün təşkil edilən dövlət mərasimində iştirak etmək məqsədilə Tehrana gələn Çin nümayəndə heyəti ilə görüşüb.
Görüş zamanı Qalibaf İran ilə Çin arasındakı strateji əməkdaşlığın gücləndirilməsi və iki ölkənin daha yaxın əlaqələr qurması lazım olduğunu qeyd edib.
Çinin İranın çətin anlarında yanında olduğunu, İranın da müharibə və atəşkəs dövründə Hörmüz boğazından keçən Çin gəmilərinə şərait yaratdığını xatırladan Qalibaf, ABŞ-ın birtərəfli siyasətləri qarşısında İran ilə Çin arasında siyasi və iqtisadi sahələrdə yaxın münasibətlərin olduqca əhəmiyyətli olduğunu vurğulayıb.
Hörmüz boğazının idarə olunması məsələsində qətiyyətli olduqlarını ifadə edən Qalibaf, ABŞ-ın Hörmüz boğazına yönəlmiş hər hansı bir müdaxiləsinə icazə verməyəcəklərini bəyan edib.
Qalibaf son olaraq İsrailin İran ilə ABŞ arasında imzalanan anlaşma memorandumunu pozmaq üçün fəaliyyət göstərdiyinə diqqət çəkərək, İranın hərbi gücünün çəkindirici xarakter daşıdığını sözlərinə əlavə edib.
