Rusiya casusluq ittihamı ilə yaponiyalı jurnalisti həbs edib
Rusiya Uzaq Şərqdə yerləşən Saxalin adasında yaponiyalı jurnalisti casusluq ittihamı ilə həbs edib.
AFN.az xəbər verir ki, bu hadisə Moskva ilə Tokio arasında artan gərginliyin növbəti əlaməti kimi qiymətləndirilir.
Rusiya Xarici İşlər Nazirliyinin sözçüsü Mariya Zaxarova saxlanılan jurnalistin “Hokkaydo Şimbun” qəzetinin əməkdaşı Yuki İmai olduğunu açıqlayıb. Zaxarova jurnalistin Rusiya ərazisində casusluq fəaliyyəti göstərməkdə ittiham olunduğunu bildirib.
Rusiyanın TASS xəbər agentliyinin məlumatına görə, Saxalindəki Yujno-Saxalinsk şəhərində qəzetin bürosunda çalışan İmai Yaponiyaya qayıtmağa hazırlaşırmış. O, bu zaman Rusiyanın müdafiə imkanları barədə məlumat toplamaq ittihamı ilə həbs edilib.
Rusiyanın Federal Təhlükəsizlik Xidməti (FSB) jurnalistin topladığı məlumatları Yaponiya kəşfiyyatına ötürməyi planlaşdırdığını iddia edib.
FSB maskalı polislərin otel otağına basqın etməsi, bir şəxsi yerə yıxaraq qandallaması anlarını əks etdirən video yayımlayıb. Həmin şəxsin Moskvaya aparıldığı və məhkəmənin onun barəsində həbs qətimkan tədbiri seçdiyi bildirilib.
Həbsin və ya məhkəmə iclasının dəqiq nə vaxt keçirildiyi açıqlanmayıb. İttihamlar 20 ilədək həbs cəzası nəzərdə tutur.
Yaponiyanın Xarici İşlər Nazirliyi Moskvanı saxlanılan jurnalistə ədalətli və qərəzsiz yanaşmağa çağırıb. Nazirliyin nümayəndəsi bildirib ki, Yaponiyanın Moskvadakı səfirliyi və Yujno-Saxalinskdəki baş konsulluğu Rusiya rəsmilərindən məlumat istəyib. O, həmçinin jurnalistə humanist münasibət göstərilməsini və ədalətli davranılmasını tələb etdiklərini qeyd edib.
“Hokkaydo Şimbun” qəzetinin açıqlamasında Rusiya rəsmilərinin məlumatından xəbərdar olduqları, lakin təfərrüatların hələ dəqiqləşdirildiyi bildirilib. Açıqlamada jurnalistin təhlükəsizliyinin əsas prioritet olduğu vurğulanıb.
Yuki İmainin həbsi Yaponiya ilə Rusiya arasında münasibətlərin sürətlə pisləşdiyi bir dövrdə baş verib.
Gərginliyin səbəbləri arasında Tokionun Ukraynaya dəstəyi və Saxalin yaxınlığındakı Kuril adalarının suverenliyi ilə bağlı uzunmüddətli mübahisə var. Yaponiya öz ərazisinə ən yaxın olan dörd ada üzərində iddia irəli sürür.
Həmin adalardan ən yaxını Hokkaydo adasından dörd kilometrdən də az məsafədə yerləşir.
Rusiya Ukraynaya qarşı müharibəyə görə Qərbin sanksiyalarına qoşulduğundan Yaponiyanı dost olmayan ölkə hesab edir. Son illərdə Rusiya dost olmayan ölkələrin bir neçə vətəndaşını Qərb kəşfiyyat xidmətləri üçün işləməkdə ittiham edərək həbs edib.
2023-cü ildə amerikalı jurnalist Evan Gerşkoviç casusluq ittihamı ilə həbs olunub və daha sonra 16 il müddətinə azadlıqdan məhrum edilib. O, 2024-cü ildə həyata keçirilən məhbus mübadiləsi nəticəsində azadlığa buraxılıb.
Rusiya xəbər agentlikləri FSB-nin Yaponiya vətəndaşına qarşı cinayət işi açdığını və onun məhkəməyədək həbsdə saxlanıldığını bildirib. Rusiya mediasının məlumatına görə, jurnalist dekabrın 12-dək həbsdə qalacaq.
Zaxarova Tokionun Rusiyadakı müxbirlərindən dövlət təhlükəsizliyinə xələl gətirmək məqsədilə məlumat toplamaq üçün istifadə etmək cəhdlərinin təəssüf doğurduğunu bildirib. O, bunun təcrid olunmuş hal olmadığını iddia edib.
Kuril adaları İkinci Dünya müharibəsinin sonundan bəri Rusiyanın nəzarəti altındadır. Sovet qüvvələri müharibənin son günlərində adaları ələ keçirərək təxminən 17 min yapon sakininin ərazini tərk etməsinə səbəb olub. Sonradan onların yerini təxminən eyni sayda rusiyalı tutub.
Moskva 2022-ci ildə Yaponiyanın Ukraynaya dəstəyinə etiraz olaraq keçmiş sakinlərin əcdadlarının məzarlarını ziyarət etmək üçün adalara səfər etməsinə imkan verən proqramı ləğv edib.
Rusiya Prezidenti Vladimir Putinin avqust ayında mübahisəli adalardan birinə səfər etməsi Yaponiyada narazılığa səbəb olub.
Tokio Rusiyaya qarşı sanksiyaları tətbiq etməyə və Ukraynaya dəstək verməyə davam edəcəyini açıqlayıb.
