Rutte: NATO Rusiyanın hibrid hücumlarına zərurət yaranarsa cavab verəcək
NATO-nun baş katibi Mark Rutte Rusiyanın alyans müttəfiqlərinə qarşı hibrid və kiberhücumlarına qarşı lazımi hazırlıq gördüklərini bildirib.
AFN.az xəbər verir ki, Rutte zərurət yaranacağı təqdirdə cavab verəcəklərini, lakin bunun hər zaman açıq şəkildə görünməyəcəyini vurğulayıb.
Rutte Estoniyanın paytaxtı Tallində Baş nazir Kristen Mixal ilə keçirdiyi birgə mətbuat konfransında çıxış edib.
Rusiyanın əlaqəli olduğu hibrid hücumların artmasına diqqət çəkilərək Moskvanın Avropaya qarşı kölgə müharibəsi apardığının qəbul edilməli və İran kimi terrorizmi dəstəkləyən tərəf kimi qiymətləndirilməli olub-olmadığı soruşulub. Rutte NATO-nun bu cür fəaliyyətlərə qarşı hazırlıqlı olduğunu vurğulayıb.
Rutte Rusiyanın həyata keçirdiyi hibrid, kiber və digər fəaliyyətlərə qarşı təlim keçdiklərini və hazırlaşdıqlarını bildirib. O, zəruri olan bütün cavab variantlarına malik olduqlarını qeyd edib.
Veriləcək cavabların hər zaman ictimaiyyətə açıqlanmayacağını deyən Rutte görülən tədbirlərin həmişə görünməyəcəyini və açıq şəkildə elan edilməyəcəyini vurğulayıb. Onun sözlərinə görə, NATO hər dəfə eyni şəkildə cavab verməyəcək: bəzi hallarda cavab simmetrik, bəzi hallarda isə asimmetrik olacaq.
Rutte 2024-cü ilin dekabr ayının sonunda Estoniya ilə Finlandiya arasındakı sualtı kabelin kəsilməsindən sonra NATO-nun 2025-ci ilin yanvarında Baltik dənizində “Baltic Sentry” (Baltik keşikçisi) əməliyyatına başladığını xatırladıb. O, bunu açıq şəkildə görünən cavab nümunəsi kimi təqdim edib.
Rutte görülən tədbirlərin hər zaman görünməyəcəyini, lakin NATO-nun daha güclü olduğunu bildirib. Onun sözlərinə görə, Rusiya yaxşı vəziyyətdə deyil və hibrid hücumlar, eləcə də digər fəaliyyətlər zəifliyin göstəricisidir.
Rusiyanın məqsədinin NATO müttəfiqlərini narahat etmək olduğunu deyən Rutte Moskvanın alyansın bütün günü bu məsələləri müzakirə etməsini, təşvişə düşməsini və bununla bağlı mətbuat konfransları keçirməsini istədiyini bildirib. O, NATO-nun bu yola getməyəcəyini və zərurət yaranarsa cavab verəcəyini, lakin bunun hər zaman görünən olmayacağını bir daha vurğulayıb.
Rutte NATO-nun müdafiə investisiyalarını artırmağa və Ukraynaya lazım olan dəstəyi göstərməyə davam edəcəyini bildirib. O, sakit qalaraq fəaliyyətlərini davam etdirəcəklərini, bunun müdafiəyə sərmayə qoymaqla yanaşı, Ukraynanın müharibədə güclü qalması üçün ehtiyac duyduğu vasitələrlə təmin edilməsini də əhatə etdiyini deyib.
Estoniyanın Avropa ölkələrinin maliyyəsi hesabına Ukraynaya ABŞ istehsalı olan hərbi avadanlıqların verilməsini nəzərdə tutan PURL təşəbbüsünə töhfəsinin əhəmiyyətinə diqqət çəkən Rutte bunu Rusiyanın istənilən hibrid hücumuna verilə biləcək ən yaxşı cavab kimi qiymətləndirib.
Rusiyanın NATO ərazisinə qarşı mümkün təhdidini şərh edən Rutte alyans ərazisinə qarşı yaxın təhlükə görmədiklərini bildirib.
O, mümkün hərbi qüvvə cəmləşdirilməsinə qarşı tədbir görəcəklərini deyib. Rutte NATO-nun zəruri müdafiə planlarına malik olduğunu və hazırlıqlı vəziyyətdə olduğunu vurğulayaraq şərq cinahı boyunca əlaqələndirilmiş şəkildə yerləşdirilən irəli mövqeli quru qüvvələrinin olduğunu qeyd edib.
Rusiyanın NATO-ya hücum edəcəyi təqdirdə veriləcək cavabla bağlı danışan Rutte Moskvanın belə bir hücum edəcək qədər ağılsız davranacağı halda nə edəcəklərinin görüləcəyini bildirib. O, təfərrüatları açıqlamayacağını, lakin NATO-nun özünü müdafiə edəcəyinə əmin olmağın mümkün olduğunu deyib.
NATO-nun müdafiə alyansı olduğunu vurğulayan Rutte başqa tərəfə heç vaxt hücum etməyəcəklərini, çünki bunun onların maraqlarına uyğun olmadığını bildirib. O, alyansın həyat tərzini, maraqlarını, dəyərlərini və mədəniyyətlərini qorumaq məqsədi daşıdığını, başqalarına hücum etmək üçün mövcud olmadığını qeyd edib.
Mətbuat konfransında Ruttedən ABŞ Prezidenti Donald Trampla danışıb-danışmadığı da soruşulub.
Rutte Trampın bir gün əvvəl Ağ Evdən ayrılarkən jurnalistlərə verdiyi açıqlamaya istinad edib. NATO-nun baş katibi ABŞ prezidentinin mətbuatla qısa söhbəti zamanı kəşfiyyat məlumatlarının paylaşılmasının dayandırılmadığını açıq şəkildə bildirdiyini deyib.
