ABŞ Sudandakı münaqişə ilə bağlı humanitar atəşkəsə çağırış edib
ABŞ-ın Birləşmiş Millətlər Təşkilatındakı (BMT) Daimi Nümayəndəliyinin İdarəetmə və İslahatlar üzrə məsul səfiri Ceffri Bartos Sudanda davam edən münaqişələri qəbuledilməz adlandıraraq humanitar atəşkəsə çağırış edib.
AFN.az xəbər verir ki, Bartos Sudandakı vəziyyətlə bağlı çağırışını BMT Təhlükəsizlik Şurasının iclasında çıxışı zamanı səsləndirib.
Sudandakı münaqişənin hər gün davam etməsinin qəbuledilməz olduğunu bildirən Bartos, ölkədə mülki şəxslərin yalnız döyüşlər nəticəsində deyil, artan qıtlıq riskinin daha da ağırlaşdırdığı aclıq və sağlamlıq problemləri səbəbindən də həyatını itirdiyini deyib.
Bartos humanitar atəşkəsin zəruri olduğunu vurğulayaraq, bunun Sudan xalqının davam edən əzablarını yüngülləşdirəcəyini bildirib. O, bu məqsədə çatmaq üçün tərəflərlə işləməyə davam edəcəklərini qeyd edib.
Sülh və siyasi səylərin bir-birini gücləndirməli olduğunu vurğulayan Bartos, humanitar atəşkəs olmadan Sudan ərazisindəki mülki şəxsləri və ölkə xaricinə sığınanları da əhatə edən həqiqi dialoqun qurula bilməyəcəyini bildirib.
Bartos BMT Təhlükəsizlik Şurasını Sudana silah axınının davam etməsinin qarşısını almaq üçün konkret addımlar atmağa və ölkədə hərtərəfli siyasi həllə dəstək verməyə çağırıb. O, istənilən milli siyasi dialoqun Sudan xalqının iştirakı və liderliyi ilə həyata keçirilməli olduğunu vurğulayaraq, sülhü bərpa etməyin və hakimiyyəti Sudan xalqına qaytarmağın vaxtı çatdığını deyib.
