Sudan Birləşmiş Ərəb Əmirlikləri ilə diplomatik əlaqələri kəsdi
Sudan Birləşmiş Ərəb Əmirliklərini (BƏƏ) təcavüzkar ölkə elan edərək, onunla diplomatik əlaqələri kəsmək qərarına gəlib.
Sudanın rəsmi xəbər agentliyinin (SUNA) məlumatına görə, Sudanın Təhlükəsizlik və Müdafiə Şurası, Suveren Şuranın sədri Əbdülfəttah əl-Burhanın sədrliyi ilə iclas keçirib.
İclasdan sonra açıqlama verən müdafiə naziri Yasin İbrahim Yasin “Bütün dünya iki ildən çoxdur ki, BƏƏ-nin yerli vəkili terrorçu üsyançı Çevik Dəstək Qüvvələri (RSF) vasitəsilə Sudanın suverenliyinə, ərazi bütövlüyünə və vətəndaşlarının təhlükəsizliyinə qarşı həyata keçirdiyi hücumları izləyir" deyib.
Yasin "BƏƏ milləti müdafiə etmək və onun resurslarını qorumaq vəzifəsi daşıyan qanuni qurum olan Silahlı Qüvvələrimiz tərəfindən məğlub edilən yerli vəkilinin məğlub olacağına əmin olanda dəstəyini artırdı və üsyançıları (HDK) qabaqcıl strateji silahlarla təmin etmək üçün daha çox imkanlarını səfərbər etdi" ifadəsini işlədib.
Yasin BƏƏ-nin ölkədəki həyati əhəmiyyətli obyektləri və xidmət obyektlərini hədəf almağa davam etdiyini, ən son olaraq neft və qaz anbarlarını, Port Sudan limanını və hava limanını, elektrik stansiyalarını və otelləri hədəf aldığını ifadə edərək, bunun milyonlarla mülki şəxsin həyatını və malını riskə atdığını, regional və beynəlxalq təhlükəsizliyi, xüsusilə Qırmızı dənizin təhlükəsizliyini təhdid etdiyini vurğulayıb.
Yasin bildirib ki, davam edən hücumdan sonra Təhlükəsizlik və Müdafiə Şurası Birləşmiş Ərəb Əmirliklərini təcavüzkar ölkə elan edib, BƏƏ ilə diplomatik əlaqələri kəsib və Sudanın səfirliyi və baş konsulluğunu geri çağırıb.
Yasin qeyd edib ki, Birləşmiş Millətlər Təşkilatı Nizamnaməsinin dövlətlərə özünümüdafiə hüququ verən 51-ci maddəsinin mətninə və ruhuna uyğun olaraq, Sudan ölkənin suverenliyini və ərazi bütövlüyünü qorumaq, mülki əhalinin müdafiəsini təmin etmək və humanitar yardımın davamlı çatdırılmasını təmin etmək üçün bütün lazımi vasitələrlə təcavüzə cavab vermək hüququnu özündə saxlayır.
