Fransada G7 sammiti başlayır
Fransanın Biarriç şəhərində bu gün keçiriləcək G7 sammiti əleyhinə Uryun şəhərində (Atlantik Pireney departamenti) təşkil edilmiş nümayişin ən azı 17 iştirakçısı saxlanılıb.
“Report” bildirir ki, nümayişçilərlə polislər arasında toqquşmalar antiqlobalistlərin düşərgəsi yaxınlığında baş verib. Etirazçılar tərəfindən atılmış fişəngin düşməsi nəticəsində dörd polis əməkdaşı yüngül xəsarət alıb. Departament prefekturasının məlumatına əsasən, qarşıdurma yerli vaxtla təxminən saat 22-da dayandırılıb.
Qeyd edək ki, bu gün axşam Fransa Prezidenti Emmanuel Makron ABŞ, Kanada, İtaliya, Yaponiya, AFR və Böyük Britaniyanın liderlərini qarşılayacaq. Danışıqlara işçi şam yeməyi ilə start veriləcək.
Virtualaz.org xatırladır ki, sammitlə əlaqədar şəhərdə güclü təhlükəsizlik tədbirləri görülüb. Xüsusən terror hücumları ehtimalına qarşı 13 min 200 polis və jandarmla yanaşı, 450 yanğınsöndürən səfərbər olunub. Liderlərin qalacağı otelə və şəhərin mərkəzinə gedən yollar nəqliyyatın hərəkətinə bağlanacaq. Şəhər mərkəzinə yalnız icazəsi olan sürücülər və piyadalar girə biləcəklər. Sammit vaxtı şəhərdəki qatar vağzalı və hava limanı da bağlı olacaq.
