Google sürücünü qəzalı körpüyə yönəltməkdə ittiham olunur
Google uçan körpüdən düşən adamın ölümündən sonra yeni bir iddia ilə üzləşib.
Filip Paksonun ailəsi onun ölümü ilə əlaqədar şirkətə qarşı iddia qaldıraraq, Google-un körpünün çökdüyünü göstərməməkdə səhlənkarlıq göstərdiyini iddia edib.
Google sözçüsü bildirib ki, şirkət iddiaları nəzərdən keçirir.
Paxson 2022-ci ilin sentyabrında Şimali Karolina ştatının Hikori şəhərində zədələnmiş körpünü keçməyə cəhd edərkən həlak olub.
Ailənin açdığı iddiaya görə, iki uşaq atası olan Paxson dostunun qızının ad günündən evə qayıdırmış və ölən zaman tanımadığı məhəllədə olub.
"Yerli yollarla tanış olmadığı üçün o, alternativ marşrutun onu sağ-salamat evə, arvadı və qızlarının yanına aparacağına ümid edərək Google Maps-ə güvəndi", - ailənin vəkilləri iddianı elan edərkən bildiriblər. Təəssüflə qeyd ediblər ki, qaranlıqda və yağışda ehtiyatla maşın sürərkən, o, heç bir şübhə etmədən Google-un köhnəlmiş təlimatlarına əməl edib və qəzaya uğrayaraq suda boğulub.
İddiaya görə, yerli sakinlər 2013-cü ildə körpünün uçmasından sonra onlayn xəritələrini dəyişmək üçün dəfələrlə Google ilə əlaqə saxlayıblar.
İddiada həmçinin körpünün saxlanması öhdəliyi olduğu iddia edilən üç yerli şirkətin də adı çəkilir.
