Moskva Londona xəbərdarlıq etdi: Ukraynaya dəstəyin nəticələri olacaq
İngiltərə şirkətləri tərəfindən istehsal olunan pilotsuz uçuş aparatlarının ilk dəfə Rusiya ərazisindəki hədəfləri vurmaq üçün istifadə edildiyinə dair xəbərlərdən sonra Moskva Londonu xəbərdar edib.
AFN.az xəbər verir ki, “Sunday Times” qəzetinin məlumatına görə, Ukrayna qüvvələri dərin zərbə əməliyyatı çərçivəsində iki İngiltərə şirkəti tərəfindən istehsal edilən pilotsuz uçuş aparatlarından istifadə edib.
Kiyev hakimiyyəti bu il Rusiya daxilində əməliyyatlarını artıraraq hərbi sənaye və enerji obyektlərinə qarşı uzaqmənzilli raket və PUA hücumlarını intensivləşdirib.
Həmçinin Rusiyanın ən böyük onlayn pərakəndə satış şirkəti Wildberries-ə məxsus nəhəng anbarlar da hədəfə alınıb. Milyardlarla funt sterlinq dəyərində məhsulun yanmasına səbəb olan bu hücumlar müharibənin təsirlərini Rusiya ictimaiyyətinə birbaşa hiss etdirib və ölkədəki iqtisadi zərəri artırıb.
Rusiyanın Londondakı səfirliyinin açıqlamasında xəbərlərin Londonun Ukrayna böhranını gərginləşdirmək yolunu seçdiyini təsdiqlədiyi bildirilib. Londonun vəkalət vasitəsilə Rusiyanı məhdudlaşdırmağa və maksimum zərər vurmağa çalışdığı iddia edilib.
Açıqlamada “Londonun hərəkətləri qaçılmaz olaraq hesabının veriləcəyi nəticələr doğuracaq. Münaqişədə iştirakı dərinləşdikcə və Kiyevin terror mexanizminə dəstəyi artdıqca ödəyəcəyi bədəl də bir o qədər yüksək olacaq” ifadələrinə yer verilib.
İngiltərə Müdafiə Nazirliyinin sözçüsü isə İngiltərənin Ukraynanın yanında olduğunu bildirərək, “İngiltərə Ukraynanın Putinin qanunsuz işğalına qarşı özünü müdafiə etməsi üçün ehtiyac duyduğu avadanlıqları təmin etməkdə qərarlıdır. Rusiya bu hökumətin Rusiyanın təcavüzünə qarşı durmaq iradəsinə şübhə etməməlidir” deyib.
Ukraynanın uzaqmənzilli PUA strategiyasının Moskvanın müharibə gəlirlərini azaltmaq və Rusiya vətəndaşlarına işğalın təsirlərini hiss etdirmək məqsədi daşıdığı bildirilir.
Münaqişəni izləyən Acled təşkilatının məlumatına görə, Kiyev iyul ayında yanvar ayı ilə müqayisədə üç dəfə çox uzaqmənzilli hücum həyata keçirib. Rusiya daxilindəki hədəflərin davamlı şəkildə vurulması Rusiya ordusunun hava hücumundan müdafiə sistemlərini daha geniş əraziyə yaymaq məcburiyyətində qalmasına səbəb olub.
Rusiya Müdafiə Nazirliyi Ukraynaya məxsus 598 PUA-nın Rusiyanın 19 bölgəsi, Qara dəniz, Azov dənizi və Krım üzərində vurulduğunu açıqlayıb.
