Tramp: Enerji atəşkəsini hər iki tərəf pozub
ABŞ Prezidenti Donald Tramp Rusiya ilə Ukrayna arasında əldə olunan enerji atəşkəsi razılaşmasının hər iki tərəf tərəfindən pozulduğunu, lakin qüvvədə qaldığını bildirib.
AFN.az xəbər verir ki, Tramp Ağ Evin qarşısında jurnalistlərin suallarını cavablandırarkən Moskva ilə Kiyev arasında enerji infrastrukturlarına hücumların dayandırılması ilə bağlı razılaşmanın hazırda qüvvədə olub-olmaması barədə danışıb.
ABŞ Prezidenti seçki mitinqində iştirak etmək üçün Ohayo ştatına yola düşməzdən əvvəl jurnalistlərə açıqlamasında tərəflərin razılaşmanı qəbul etdiyini deyib. O, bu məsələnin artıq həll edilməli olduğunu vurğulayaraq müharibəni tam fəlakət adlandırıb.
Ukrayna Prezidenti Volodimir Zelenskinin Rusiyanın razılaşmanı pozduğu barədə açıqlaması xatırladıldıqda Tramp hər iki tərəfin pozuntulara yol verdiyini bildirib.
Tramp yalnız Rusiya Prezidenti Vladimir Putinin razılaşmanı dəstəklədiyi, Zelenskinin isə bunu etmədiyi barədə xəbərlərlə razılaşmadığını qeyd edib. Onun sözlərinə görə, hər iki lider razılaşmanı dəstəkləyir.
İki ölkə arasındakı vəziyyətə də münasibət bildirən Tramp Putinin razılaşma əldə etmək istədiyini, Zelenskinin də buna hazır olmasını təmin etməyin vacibliyini söyləyib. ABŞ Prezidenti Putinin razılaşmaq istəyinin Zelenskininkindən daha güclü olduğunu düşündüyünü bildirib.
Tramp hər iki liderin razılaşma əldə etmək istədiyini, lakin bunu necə edəcəklərini bilmədiklərini iddia edib. O, tərəflərin razılığa gəlməsinə nail olmağın vacibliyini vurğulayıb.
ABŞ Prezidenti Rusiya ilə əldə etdikləri dizel yanacağı ilə bağlı razılaşmanın yalnız ABŞ üçün deyil, bütün dünya üçün əhəmiyyət daşıdığını da bildirib. Tramp bu razılaşmanı bütün ölkələrin maraqları naminə həyata keçirdiyini deyib.
Qeyd edək ki, Ukrayna Prezidenti Volodimir Zelenski daha əvvəl ABŞ Prezidenti Donald Trampın Ukrayna və Rusiya arasında enerji infrastrukturuna hücumların dayandırılması barədə əldə olunduğunu açıqladığı atəşkəsin Rusiya tərəfindən pozulduğunu bildirmişdi.
