Tramp Zelenskini Rusiyadakı dizel neft emalı zavodlarına hücumlara görə tənqid edib
ABŞ Prezidenti Donald Tramp Rusiya ilə Ukrayna arasında sülh danışıqlarında böyük irəliləyiş əldə edildiyini iddia edib.
AFN.az xəbər verir ki, Tramp bununla yanaşı, Ukrayna Prezidenti Volodimir Zelenskini dünya dizel bazarlarına ciddi zərər vuran Rusiyadakı dizel neft emalı zavodlarını hədəfə almaqda və müharibəni bitirmək istəməməkdə ittiham edib.
Tramp Truth Social sosial media platformasındakı hesabında paylaşım edib.
Rusiya ilə Ukrayna arasında müharibəyə son qoyulması üçün sülh danışıqlarını davam etdirdiyini bildirən Tramp Rusiyanı özünün ifadəsi ilə desək, axmaqcasına danışıqlar masasından uzaqlaşdıracaq heç bir addım atmaq istəmədiyini söyləyib.
Tramp mövcud girovlarla bağlı danışıqlar da daxil olmaqla, müzakirələrdə böyük irəliləyiş əldə edildiyini iddia edib və sülh sənədini istənilən vaxt imzalaya biləcəyini bildirib.
Rusiyanın İrana kömək etmək üçün çox az iş gördüyünü, hətta heç nə etmədiyini qeyd edən Tramp bunu belə davam etdirmək istədiyini vurğulayıb. O, axmaq insanlar müdaxilə etmədikcə bu vəziyyəti qoruyacağını bildirib.
Tramp, digər tərəfdən, Ukrayna Prezidenti Volodimir Zelenskini ABŞ da daxil olmaqla, dünya dizel bazarlarına ciddi zərər vurduğunu bilə-bilə Rusiyadakı dizel neft emalı zavodlarını hədəfə almaqda tənqid edib.
Bu hücumların fermerlərə və digər müəssisələrə böyük zərər vurduğunu deyən Tramp, Rusiyanın buna baxmayaraq, aşağı qiymətlərlə dünyaya milyonlarla barel dizel göndərməyə davam etdiyinə diqqət çəkib.
Tramp Zelenskinin baş verənlərə əhəmiyyət vermədiyini və Avropanın, eləcə də onun ifadəsi ilə desək, fırıldaqçı Co Baydenin əvvəllər ona verdiyi bütün pullara baxmayaraq, bu müharibəni bitirmək istəmədiyini, yəqin ki, heç vaxt da istəmədiyini iddia edib. O, Ukrayna liderinin iki il əvvəl indiki şəraitdə əldə edə biləcəyindən daha yaxşı razılaşma əldə edə biləcəyini söyləyib.
Zelenskinin ölkəsinin ağır vəziyyətdə olduğunu, ərazilərinin böyük hissəsini itirdiyini, kişi əhalisinin yaralı və ya ölü vəziyyətdə olduğunu bildirən Tramp Rusiya ilə Ukrayna arasındakı müharibənin başa çatmasını istədiyini qeyd edib.
