Polşalı fermerlər Slovakiya ilə sərhəddə keçidi bağlayıblar
Polşalı fermerlər Slovakiya ilə sərhəddə Barvinek sərhəd-keçid məntəqəsini bağlayıblar.
Bu barədə fevralın 26-da Polsat telekanalı məlumat yayıb.
10-12 traktordan ibarət qrup sərhəd-keçid məntəqəsində 1 saatlıq nəqliyyatın hərəkətini kəsib. Aksiya iştirakçıları qeyd ediblər ki, onların məqsədi Slovakiya vasitəsilə Polşaya gətirilə biləcək Ukrayna taxılını aşkarlamaqdır.
“Biz Slovakiyadan Polşaya daxil olan yük maşınlarının Ukraynadan taxıl daşıyıb-daşımadığını yoxlayacağıq. Sərhədin bir tərəfindən digər tərəfə nə qədər malın daxil olduğunu hesablayacağıq”, - deyə aksiyanın təşkilatçılarından biri Maciej Wiżowski bildirib.
O vurğulayıb ki, bir müddət sonra minik avtomobilləri bağlanan magistral yoldan problemsiz keçə biləcək. Blokada cümə axşamı axşama qədər davam edəcək.
