İslahatlar Nazirlər Kabinetindən başlamalı idi- Nazim Bəydəmirli

"Bir-birini təkrarlayan, oxşar funksionallığı olan dövlət qurumlarının birləşdirilməsi və ləğv edilməsi sadə işçilərin ixtisarı deyil, rəhbər vəzifələrin, bu vəzifələrə xidmət etmək üçün mövcud olan köməkçi idarələrin azaldılması deməkdir".

AFN xəbər verir ki, bunu iqtisadçı ekspert Nazim Bəydəmirli bildirib. Onun sözlərinə görə, 3-5 agentlik bir qurumda birləşirsə, deməli, 3-5 direktorun, 12-15 müavinin onların çoxlu sayda köməkçilərinin, katibələrinin, avtomobil və sürücülərinin, yanacaq, kommunal, telefon və digər xərclərinin də ixtisarı deməkdir: "İdarəetməni optimallaşdırmaqla bu məqsədlər üçün hər il sərf edilən büdcə vəsaitlərinə ən azı 2-3 dəfə qənaət etmək olar.
Ancaq bu birləşmələr və ləğv edilmələr Nazirlər Kabinetindən başlanılmalı idi. Baş nazirin 6 müavin postundan ikisi saxlanılmalı, bu vəzifələr də ictimai əsaslarla nazirlərdən bir illiyinə seçilməli, hər ilin prioritetinə uyğun rotasiya edilməli, yəni dəyişdirilməlidir".