Eldar İbrahimov: "Bu, necə böhrandır ki ..."
AFN.az xəbər verir ki, bunu parlamentin Aqrar siyasət komitəsinin sədri Eldar İbrahimov dilə gətirib. Onun sözlərinə görə, əksinə, bu gün Ümumi Daxili Məhsulda (ÜDM) 3 faizlik artım var: "Bu,necə böhrandır ki, ÜDM-də 3 faiz artım var?! Azərbaycanda böhran yox, əksinə, iqtisadi tərəqqi var. Düzdür, dünyada yaşanan məlum proseslər az da olsa, bizə də təsir göstərir. Hətta, yanvar ayının əvvəllərində devalvasiya, "uzən məzənnəyə" keçilməsi ilə bağlı müəyyən proseslər oldu. Ancaq dövlət başçısı dərhal öz qətiyyətli mövqeyini, iradəsini ortataya qoydu, əməkhaqlarından, pensiyalardan tutmuş müavinətlərə qədər hamısını10 faiz artırdı.
Bunun özü böyük göstəricidir. Çünki dünyanın heç bir yerində görünməyib ki, belə bir şəraitdə əməkhaqları, pensiyalar, müavinətlər artırılsın. Bunu ancaq və ancaq Azərbaycan dövləti və dövlət başçısı İlham Əliyev edə bilərdi. Çünki Azərbaycan dövlətinin və dövlət başçısının fəaliyyətinin başlıca amili insanların, vətəndaşların rifahı təşkil edir".
Komitə sədri deyib ki, dövlət başçısı keçirdiyi son müşavirə və konfransda ölkədə aqrar sektorun, kənd təsərrüfatının inkişafı məsələsini xüsusi şəkildə qabardıb: "Bildiyiniz kimi, ötən il Azərbaycanda "kənd təsərrüfatı ili" elan olunmuşdu və çox uğurlu nəticələr də qazanılmışdı. Xüsusilə də, taxıl istehsalında rekord nəticə əldə olunmuşdu. Ona görə biz bu sahədə 2015-ci ildə olan uğurlarımızı 2016-cı ildə də davam etdirməliyik. Dövlət başçısının da dediyi kimi, hər ilimiz kənd təsərrüfatı ili olmalıdır".
