Tikinti sənayesində inqilab: Sement əvəzinə göbələk kərpiclər
Alimlər göbələk və bakteriyalardan istifadə edərək özünü təmir edən, ekoloji cəhətdən təmiz tikinti materialı hazırlayıblar.
ABŞ-ın Montana ştatında tədqiqatçılar göbələklər tərəfindən yerin altında əmələ gələn kökə bənzər strukturlar olan miselyumdan istifadə edərək canlı, özünü təmir edən tikinti materialı hazırlayıblar. Çevik və süngər quruluşuna baxmayaraq, bu material sərtləşir və yükdaşıyan olur.
Tədqiqat rəhbəri doktor Çelsi Heveran vurğulayıb ki, bu kəşf ətraf mühitə zərər verən sementi əvəz edə biləcək bioloji tikinti materialının hazırlanması istiqamətində mühüm addımdır. Məlumdur ki, sement istehsalı hər il 4 milyard tondan artıqdır və qlobal karbon emissiyasının 8 faizini təşkil edir.
Tədqiqatçılar miselyuma kalsium karbonat istehsal edə bilən bakteriyalar əlavə ediblər. Bu prosesdə bakteriyalar miselyumu sümük quruluşuna çeviriblər. Beləliklə, davamlı, uzunmüddətli və canlı tikinti materialı əldə edilib.
Bu yeni yaradılmış canlı material dörd həftəyə qədər bakteriyaları aktiv saxlaya bilir. Tədqiqatçılar hesab edirlər ki, gələcəkdə bu strukturlar havanın keyfiyyətini hiss edə və ya çatları özləri düzəldə bilər.
Bu ixtira həyəcan verici olsa da, ekspertlər bunun hələ kiçik miqyaslı təcrübə olduğunu və iri miqyaslı tikintidə istifadə edilməzdən əvvəl daha çox sınaq tələb olunduğunu bildirirlər.
Alimlər hesab edirlər ki, bu cür tikinti materialları xüsusilə fəlakət zonalarında və ya kosmosda infrastrukturun qurulması üçün ideal ola bilər. Çünki bu materiallar sement daşımaq əvəzinə, yerində istehsal oluna bilər.
