“Unibank”ın riskli aktivləri artıb - RƏQƏMLƏR
“Unibank” ASC 2023-cü ilin yekunları üzrə maliyyə hesabatını açıqlayıb.
“Ölkə.Az”ın məlumatına görə, sözügedən dövrə bankın cəmi aktivləri 1 590,659 mln manat təşkil edib. Bu isə 2022-ci ilin eyni dövrü ilə müqayisədə 10,4% çoxdur.
Müştərilərə verilmiş kreditlərin həcmi illik müqayisədə 17,8% artaraq 1 047,741 mln manat təşkil edib.
Öhdəliklər artıb
2022-ci ilin son rübünün yekunları ilə müqayisədə bankın depozit portfeli 22,8% artaraq 1 001,258 mln manata çatıb. Bankın cəmi öhdəlikləri isə 8,6% artaraq ötən ilin dekabrın 31-ə 1 441,830 mln manat təşkil edib.
Səhmdar kapitalı 138,200 mln manat, yığılmış zərəri 2,103 mln manat olan “Unibank”ın cəmi kapitalı 148,830 mln manat təşkil edib. Bu isə illik müqayisədə 31,2% çoxdur.
2023-cü ilin son rübünün yekununda bankın xalis faiz gəlirləri 133,031 mln manat, xalis qeyri-faiz xərcləri isə 57,934 mln manat təşkil edib.
Riskli aktivlər artıb
Əməliyyatlarını 75,097 mln manat mənfəətlə icra edən bank mümkün zərərlərin ödənilməsi üçün xüsusi ehtiyatın yaradılmasına ayırmalarını illik müqayisədə 42,5% artıraraq 33,591 mln manata çatdırıb. Bu da bankın riskli aktivlərinin artımından xəbər verir.
Mənfəətindən 8,576 mln manat vergi ödəyən bank ötən ili 32,931 mln manat xalis mənfəətlə başa vurub.
