Dinozavrlar haqqında yeni kəşf: Ayaq izləri onların birlikdə yaşadıqlarını ortaya qoyur
Şotlandiyanın Skye adasında tapılan yeni dinozavr ayaq izləri 167 milyon il əvvəl ot yeyən və ətyeyən dinozavrların şirin su laqonlarında birlikdə yaşadığını ortaya qoyur.
Edinburq Universitetindən bir qrup adanın Trotternish yarımadasındakı Prince Charles-da tapılan 131 ayaq izini araşdırıb. Tədqiqat T-Rex-in əcdadı olan cip ölçülü ətyeyən meqalozavrların nadir izlərini və filin ölçüsündən iki-üç dəfə böyük olan uzun boyunlu ot yeyən sauropodların iri dairəvi izlərini tapıb.
Tədqiqatçılar bildiriblər ki, ərazidəki izlər vaxtilə geoloqlar tərəfindən balıqların istirahət çuxurları kimi qəbul edilib. Ancaq təhlillər göstərib ki, bu izlər Orta Yura dövründə dinozavrların ətraf mühitə üstünlükləri və davranışları haqqında mühüm ipucu verir.
Alimlər onların çox yönlü ayaq izlərini və gəzinti nümunələrini araşdıraraq müəyyən ediblər ki, bu tarixdən əvvəlki canlılar müasir heyvanların su mənbələri ətrafında toplaşdıqları kimi laqonların kənarlarında cəmləşiblər.
Elm adamları dinozavrların quru palçıq yerləri yerinə dayaz laqon mühitlərinə üstünlük verdiklərini bildiriblər.
İlk üç ayaq izi beş il əvvəl Edinburq Universitetinin bir tələbəsi və komandası tərəfindən sahil zolağında aşkar edilib. Daha sonra ərazidə tapılan digər izlər onu Şotlandiyanın ən böyük dinozavr izi yerlərindən birinə çevirib. Mütəxəssislər yeni kəşflərin olacağını gözlədiklərini deyirlər.
Ərazini ətraflı araşdırmaq üçün tədqiqat qrupu minlərlə hava fotoşəkili çəkib və fotoqrammetriyadan istifadə edərək ayaq izlərinin 3D modellərini yaradıb.
Tədqiqat "PLOS One" jurnalında dərc edilib və "Leverhulme Trust" və "National Geographic Society" tərəfindən maliyyələşdirilib.
